پاکستان باش وزیری شهباز شریف، ترورچیلر هنوز افغانستان توپراغیدن پاکستانگه هجوم قیلیش و بېگناه انسانلرنی اۉلدیریش اوچون فایدهلنهیاتگنینی ایتدی.
پاکستان باش وزیری بوگون (سهشنبه، ۱۰-سنبله) شانگهای همکارلیک تشکیلاتیدهگی نطقیده افغانستان توپراغیدن پاکستانگه ترورچیلیک هجوملری دوام اېتر اېکن، منطقهده تینچلیک اۉرنهتیلمسلیگینی تأکیدلهدی.
او افغانستان توپراغیدن پاکستان و باشقه قۉشنی دولتلرگه اویوشتیریلهیاتگن ترورچیلیک هجوملری ثمرهلی طرزده تۉختهتیلیشی کېرهکلیگینی قۉشیمچه قیلدی.
پاکستان باش وزیری عینِ پیتده پاکستان تینچ، برقرار و فراوان افغانستاننی ایستشینی ایتدی.
پاکستان طالبلر افغانستانده قَیته حاکمیتنی اېگهلهگنیدن بېری ترورچی گروهلر اوشبو مملکت توپراغیدن پاکستانگه هجوم قیلیش اوچون فایدهلنهیاتگنینی بیر نېچه بار دعوا قیلیب کېلهدی.
پاکستان رسميلری، خصوصاً، «پاکستان طالبانی» (تی تی پی) حرکتی رهبرلری و اعضالری همده «بلوچستان آزادلیک حرکتی» نینگ افغانستانده موجودلیگیگه اشاره قیلیب، افغانستانده تروریزمگه قرشی کمسیتیشسیز کورهش آلیب باریشنی طلب قیلگن. اَیریم حالتلرده اېسه طالباننی اوشبو گروهلرنی قۉللب-قوّتلشده عیبلهگن.
بیراق افغانستاندهگی طالبلر اوشبو گروهلرنینگ مملکت حدودیده موجودلیگینی انکار اېتهدی و هېچ بیر گروهگه افغانستان توپراغیدن باشقه دولتلرگه قرشی فایدهلنیشگه رخصت بېرمسلیگینی ایتهدی.
