امریکا طالبلرنینگ افغانستان کانچیلیک ساحهسیگه سرمایه کیریتیش حقیدهگی پیشنهادینی رد اېتیب، «ترورچیلر» بیلن مذاکره آلیب بارمسلیگینی معلوم قیلدی.
امریکا قوشمه ایالتلری تشقی ایشلر وزیرلیگی بو بارهده امریکا آوازی سوالیگه بېرگن جوابیده واشنگتن افغانستانده فایدهلی قزیلمهلرنی رواجلنتیریش مسألهسیده «گلوبل ترورچی گروه» بۉلگن طالبان بیلن همکارلیک قیلیش رېجهسیگه اېگه اېمسلیگینی ایتدی.
امریکا تشقی ایشلر وزیرلیگی سوزلاوچیسی: «بوندهی قیلیش (امریکانینگ افغانستان کانچیلیک ساحهسیگه سرمایه کیریتیشی) فقط طالبلر قۉلیگه پول توشیشیگه و اولرنینگ افغانستان خلقیگه نسبتاً دهشتلی خطی-حرکتلرینی عملگه آشیریشیگه امکان بېریشی ممکن»، دېب قۉشیمچه قیلدی.
طالبلر تشقی ایشلر وزیری امیرخان متقی فایننشل تایمز نشریگه بېرگن صحبتیده طالبلر امریکانینگ افغانستان کانچیلیک ساحهسیگه سرمایه کیریتیشینی آلقیشلشینی ایتگن اېدی.
طالبلر مطبوعات سوزلاوچیسی ذبیح الله مجاهد هم بوگون طالبلر امریکا بیلن یخشی مناسبتلرنی ایستشینی، افغانستانگه امریکا بیلن دیپلوماتیک و اقتصادي علاقهلر ضرورلیگینی تأکیدلهدی.
طالبان افغانستانده قَیته حاکمیتنی قۉلگه آلگنیدن بېری بیر نېچه بار امریکا بیلن دیپلوماتیک مناسبتلر اۉرنهتیشنی ایستشینی بیلدیرگن و «یخشی نیت» بېلگیسی صفتیده بیر نېچه امریکالیک محبوسنی هم آزاد قیلگن.
بیراق واشنگتن حاضرگچه طالبلر بیلن رسمي ملاقات قیلیشگه قیزیقیش بیلدیرمهگن. امریکا رسميلری اۉزلرینینگ رسمي بیاناتلریده همان طالباننی ترورچی گروه دېب اتهماقده.
