ایران ساغلیقنی سقلش وزیرلیگینینگ معلوم قیلیشیچه، امریکانینگ سۉنگگی هجوملریده، جملهدن، سِریکدهگی تۉی مراسمیگه اویوشتیریلگن هجومده۱۸ کیشی هلاک بۉلگن و ینه ۱۴۲ کیشی یرهلنگن.
مذکور وزیرلیک مطبوعات سوزلاوچیسی حسین کرمانپور بوگون (پنجشنبه،۱۲-سنبله) اوشبو رقملرنی ایکس اعلان قیلیب، هلاک بۉلگنلر و یرهلنگنلر آرهسیده عیاللر همده بالهلر بارلیگینی ایتگن.
اونینگ معلوم قیلیشیچه، ۸-سنبلهدن ۱۱-سنبلهگچه بۉلگن دورده اقش هجوملری عاقبتیده ۱۸کیشی هلاک بۉلگن و ۱۴۲ کیشی یرهلنگن. هلاک بۉلگنلر آرهسیده ایکّی عیال و بیر باله، یرهلنگنلر آرهسیده اېسه ۶۱ عیال و ۴۴ باله بار.
سهشنبه آقشامیده (۱۰-سنبله) ایران جَنوبیدهگی هرمزگان سِریک حدودینینگ کوهستک پورت شهریده بۉلیب اۉتهیاتگن تۉی مراسمی راکت ضربهسیگه اوچرهگن.
ایراننینگ اَیریم حکومت وکیللری و ییتکرمهلر اوشبو مراسم اتهیلب نشانگه آلینگنینی بیلدیرگن. بیراق امریکا مرکزي قوماندانلیگی سنتکام مطبوعات سوزلاوچسی قۉشمه شتاتلر تینچ اهالیگه هجوم قیلمسلیگینی ایتیب، واقعهنی اۉرگنیب چیقیشینی بیلدیرگن.
بیبیسی فارسی کېچه بېرگن خبریده تۉی مراسمی اۉتکزیلهیاتگن بنا دکل مخابراتی منارهسیدن «بیر نېچه متر» اوزاقلیکده جایلشگنی و مناره نشانگه آلینگن پیتده اوشبو حادثه یوز بېرگنینی معلوم قیلگن اېدی. بیراق بیبیسی نینگ بوگون اېرتهلب تېکشیروو بۉلیمی اعلان قیلگن ینگی خبریده دکل مخابراتی منارهسی تۉی مراسمی اۉتکزیلگن اویدن «۱۱۲متر» اوزاقلیکده اېکنی ایتیلگن.
بیرلشگن ملتلر تشکیلاتی باش کاتبی آنتونیو گوترش اوشبو تۉی مراسمی نینگ نشانگه آلینگنیدن خواطر بیلدیرگن و تینچ اهالینی حمایه قیلیشگه چقیرگن.
بیرلشن ملتلر تشکیلاتی باش کاتبی مطبوعات سوزلاوچیسی استفان دوجاریک شوندهی دېدی: «بیرلشگن ملتلر تشکیلاتی باش کاتبی تینچ اهالی آرهسیدهگی قربانلر، جملهدن، تۉی مراسمیگه قیلینگن هجوم حقیدهگی خبرلردن چوقور خواطرده. تینچ اهالیگه هجوم قیلیش هېچ قندهی طرزده مقبول اېمس.»
استفان دوجاریک کوندهلیک مطبوعات انجمنیده ژورنالیستلرگه باش کاتب برچه تامانلرنی «اۉزینی تيیشگه» و «دیپلوماتیک» یۉلیدن باریشگه چقیرهیاتگنینی ایتدی.
