پاکستان قوراللی کوچلری جماعتچیلیک بیلن علاقهلر ادارهسی افغانستان توپراغیدن پاکستانگه کیریشگه اورینگن ۱۵ نفر پاکستان طالبلر حرکتی (تیتیپی) اعضاسی اۉلدیریلگنینی معلوم قیلدی.
پاکستان قوراللی کوچلری جماعتچیلیک بیلن علاقهلر ادارهسی بوگون (پنجشنبه، ۱۲سنبله) نشر قیلگن بیاناتیده اوشبو شخصلر سهشنبه (۱۰-سنبله) تانگیده شمالي وزیرستانگه کیریشگه اورینگنینی بیلدیرگن.
بیاناتده ایتیلیشیچه، تۉقنهشوو نتیجهسیده ۱۵ کیشیدن عبارت تیتیپی گروهینینگ برچه اعضالری پاکستان حدودیده اۉلدیریلگن.
پاکستان رسميلری ینه ایکّی خوفسیزلیک حادثهسی حقیده هم خبر بېریب، اولرده افغانستان وطنداشلری یاکه افغانستاندن قَیتگن شخصلر اشتراک اېتگنینی ایتگن.
پاکستان تروریزمگه قرشی کورهش باشقرمهسی بیاناتیده کېچه تونده پېشاورده اۉتکزیلگن عملیات نتیجهسیده «خوارج فتنهسی» دېب اتهلووچی گروهنینگ تۉرت نفر جنگریسی، جملهدن بیر قوماندان و بیر نفر افغانستان وطنداشی اۉلدیریلگنینی معلوم قیلگن.
اوشبو اداره اۉلدیریلگن تۉرت کیشیدن بیرینینگ چۉنتهگیدن افغانستاننینگ کنر ولایتیده یشاوچی امانخان نامیگه بېریلگن شخصنی تصدیقلاوچی حجت تاپیلگنینی بیلدیرگن. اداره معلوماتیگه کۉره، حجتدهگی صورت اۉلدیریلگن شخصنینگ یوزیگه ماس کېلگن.
شونینگدېک، پاکستان تروریزمگه قرشی کورهش ادارهسی علیحده بیاناتیده افغانستاندن «ترورچیلیک عملیاتلرینی» عملگه آشیریش اوچون پاکستان حدودیگه کیرگن پاکستان طالبان حرکتی نینگ (تیتیپی) ایکّی اعضاسی کراچیده حبسگه آلینگنینی معلوم قیلگن.
اداره حبسگه آلینگن شخصلرنی عمر فاروق و عبدالله دېب اتهگن. اولرنینگ پولیس خادملری و خوفسیزلیک ادارهلری، خصوصاً، یقینده هجومگه اوچرهگن «سند رنجرز» حربي قرارگاهینی کوزهتیب بارگنینی همده اوشبو جایلر حقیدهگی معلوماتلرنی اۉز باشلیقلریگه یوبارگنینی بیلدیرگن.
طالبلر پاکستان طالبلر حرکتینی (تیتیپی) «خوارج فتنهسی» دېب اتهیدی و اوشبو گروه هندستاننینگ بویروغی همده افغانستان طالبالرینینگ همکارلیگیده پاکستاننی بېقرارلشتیریشگه اورینهیاتگنینی تأکیدلهیدی.
بیراق هندستان تیتیپی و افغانستان طالبلرینینگ حکومتگه قرشی حربي عملیاتلریده اشتراک اېتهیاتگنینی، شونینگدېک، اوشبو گروه اعضالریگه باشپناه بېرهیاتگنینی دایما رد اېتیب کېلگن.
