کانادا تشقی ایشلر وزیرلیگی اۉز وطنداشلریدن «بېقرار خوفسیزلیک وضعیتی، تروریستیک هجوملر، دوام اېتهیاتگن قوراللی تۉقنهشوولر، آدم اۉغیرلش، اۉزباشیمچهلیک بیلن حبسگه آلیش و قماققه آلیش خوفی، جنایتچیلیک درجهسی نینگ یوقاریلیگی همده طالبلر رسميلری تامانیدن انسان حقوقلرینینگ کېنگ کۉلمده بوزیلیشی سببلی» افغانستانگه هر قندهی سفردن تيیلیشنی سۉرهگن.
اوشبو وزیرلیک بیانات اعلان قیلیب، افغانستاندهگی خوفسیزلیک وضعیتی همان جوده بېقرار و خوفلی اېکنینی معلوم قیلگن.
کانادا تشقی ایشلر وزیرلیگی اۉز وطنداشلریگه مراجعت قیلیب: «اگر افغانستانده بۉلسنگیز، خوفسیزراق جایگه کۉچیش ضرورتی توغیلگنده احتیاط چارهلرینی کۉرینگ و شخصي خوفسیزلیک رېجهلرینگیزنی قَیته کۉریب چیقینگ. اۉزینگیز و عایلهنگیز خوفسیزلیگی اوچون مسوول اېکه نینگیزنی اونوتمنگ»، دېب یازگن.
وزیرلیک، شونینگدېک، کانادانینگ افغانستاندهگی اېلچیخانهسی فعالیتینی توختهتگنینی و اوشبو دولتنینگ افغانستانده قنسوللیک یاردمی همده باشقه کۉمکلرنی کۉرسهتیش امکانیتی جوده چېکلنگنینی بیلدیرگن.
کانادا بوندن اوّل هم خوفسیزلیک خطرلری سببلی اۉز وطنداشلرینی افغانستانگه بارمسلیک حقیده بیر نېچه بار آگاهلنتیرگن.
کانادا طالبلر افغانستانده حاکمیتنی قَیته قۉلگه کیریتگنیدن سۉنگ اوشبو مملکتدهگی اېلچیخانهسینی یاپگن و افغانستاندهگی طالبلر حکومتینی تن آلمهیدی.
شونگه قرهمهی، بو مملکت کۉپلب افغانستانلیک سیاسي و مدنیت فعاللری، عیاللر همده ژورنالیستلرگه باشپناه بېرگن و اولرنی طالبلر نظارتیدهگی افغانستاندن آلیب چیقیب کېتگن.
