بوسنيا و هرزگوین پولیسی مملکت حدودیدن ناقانوني روشده چېگرهنی کېسیب اۉتیشگه اورینگن ۹۶ نفر باشپناهچینی توختهتیب، قۉلگه آلگنینی معلوم قیلدی. اولر آرهسیده۱۸ نفر افغانستان فقراسی هم بار.
«سارایوو تایمز»، نشرینینگ خبر بېریشیچه، بو شخصلر چهارشنبه کونی (۱۱-سنبله) «بیستریتسا» شهریده ایکّی علیحده حالتده، بوسنيا و هرزگوین پولیسی همده «صربسکا» ایچکی ایشلر وزیرلیگی همکارلیگیده قۉلگه آلینگن.
خبرگه کۉره، چهارشنبه کونی توشدن کېین ۶۳کیشیدن عبارت گروهنینگ چېگرهنی ناقانوني کېسیب اۉتیشیگه یۉل قۉییلمهگن. گروه ترکیبیده۴۰ نفر پاکستان و۲۳ نفر بنگلادیش فقراسی بۉلگن.
شو کونی کېچقورون پولیس ینه 33 کیشی نینگ چېگرهنی ناقانوني کېسیب اۉتیشگه اورینیشی نینگ آلدینی آلگن. اولر آرهسیده ۱۸نفر افغانستان، ۱۳نفر پاکستان و ایکّی نفر بنگلادیش فقراسی بۉلگن.
بوسنيا و هرزگوین پولیسی قۉلگه آلینگن شخصلر بۉییچه تېرگاو و حقوقي جریانلر دوام اېتهیاتگنینی بیلدیرگن.
سۉنگگی ییللرده آدم سوداسی و ناقانوني مهاجرت بیلن شغللنووچی گروهلر باشپناهچیلرنی بالقان دولتلری آرقهلی اروپاگه آلیب اۉتیشگه اورینیب کېلماقده.
اوشبو یۉنهلیشده آدم اۉغیرلش بیلن شغللنووچی گروهلر هم فعال بۉلیب، اولر بیر نېچه بار باشپناهچیلرنی اۉغیرلب کېتگن. اَیریم حالتلرده اېسه باشپناهچیلر اۉلدیریلگن.
