پاکستاننینگ کابلدهگی اېلچیسی عبدالرحمن نظامی باش وزیرنینگ بیرینچی اۉرینباسری و پاکستان تشقی ایشلر وزیری محمداسحاقدار بیلن خوفسیزلیک وضعیتی حقیده بحثلشدی.
پاکستان تشقی ایشلر وزیرلیگی ترقتگن بیاناتده ایتیلیشیچه، بحث دوامیده منطقهدهگی اۉزگریشلر، جملهدن، پاکستانگه علاقهدار مسألهلر هم محاکمه قیلینگن.
باش وزیرنینگ بیرینچی اۉرینباسری و پاکستان تشقی ایشلر وزیری منطقهدهگی، اینیقسه تینچلیک و خوفسیزلیککه تأثیر کۉرسهتهدیگن جریانلرنی یقیندن کوزهتیب باریش مهملیگینی تأکیدلهدی.
پاکستان رسميلرینینگ ایتیشیچه، پاکستانلیک جنگریلر افغانستانده جایلشگن و بو مملکت توپراغیدن پاکستانگه قرشی فایدهلنماقده.
پاکستان باش وزیری جاري هفته شانگهای همکارلیک تشکیلاتی ییغینیده افغانستان توپراغیدن پاکستانگه قرشی ترورچیلیک هجوملری دوام اېتر اېکن، منطقهده تینچلیک اۉرنهتیلمسلیگینی ایتدی.
او افغانستان توپراغیدن پاکستان و باشقه قۉشنی دولتلرگه اویوشتیریلهیاتگن ترورچیلیک هجوملری ثمرهلی طرزده توختهتیلیشی کېرهکلیگینی قۉشیمچه قیلدی.
بیراق طالبان پاکستان رسميلرینینگ دعوالرینی رد اېتیب، افغانستان توپراغی هېچ بیر دولت اوچون تهدید اېمسلیگینی تأکیدلهماقده.
پاکستانلیک جنگریلر، جملهدن، پاکستان طالبان حرکتی (تیتیپی) اعضالرینینگ افغانستانده موجودلیگی طالبان و پاکستان حکومتی اۉرتهسیدهگی کېسکینلیککه سبب بۉلماقده.
پاکستان اوردوسی افغانستاندهگی پاکستانلیک طالبلر جنگریلرینینگ یشیرین باشپناهلری دېب اتهیاتگن حدودلرگه بیر نېچه بار هوا هجوملری اویوشتیرگن. طالبلر اېسه بو هجوملرگه جوابن چېگره حدودلریدهگی پاکستان حربي پوستهلریگه هجوم قیلگن.
عینِ پیتده افغانستان و پاکستان اۉرتهسیدهگی چېگره یاپیق، ایکّی دولت اۉرتهسیدهگی سودا اېسه توختهتیلگن.
