طالبلر استخباراتی بیلن باغلیق ییتکرمهلر فاریاب ولایتیده طالبلرگه قرشی قوراللی قرشیلیک کۉرسهتیشده عیبلنیب، ایکّی کیشی حبسگه آلینگنی حقیده خبر ترقهتدی.
طالبلرنینگ اجتماعي ترماقلردهگی ترغیبات کاناللری بوگون، شنبه، ۱۴-سنبله کونی ایکّی اېرکک طالبانگه قرشی قوراللی گروه اعضاسی بۉلگنینی تن آلگن ویدېولرنی ترقهتماقده.
بو شخصلر اجتماعي ترماقلر آرقهلی و پول عوضیگه طالبلرگه قرشی گروهگه جلب قیلینگنینی، مذکور گروه اۉز فعالیتینی رسماً اعلان قیلیشنی رېجهلشتیرگنینی اَیتماقده.
شونینگدېک، اوشبو واقعه بیلن باغلیق ینه بیر ویدېو ترقهتیلگن. اونده، کۉرینیشیدن، عینِ شخصلر جاري هجري-شمسي ییل نینگ 22-اسد کونی «افغانستان آزادلیک حرکتی» نامی آستیده اۉز فعالیتینی اعلان قیلگنی عکس اېتگن.
اولرنینگ حبسگه آلینگنی حقیدهگی خبر اولر «افغانستان آزادلیک جبههسی» نامی آستیده اۉز فعالیتینی اعلان قیلگنیدن قریب اوچ هفته اۉتیب ترقهلدی.
سۉنگگی بېش ییل دوامیده طالبانگه قرشی بیر نېچته قوراللی جبههلر اۉز فعالیتینی اعلان قیلگن. بیراق جاري هجري-شمسي ییل باشیگچه بیرلشگن ملتلر تشکیلاتی و مستقل تشکیلاتلر اوشبو جبههلر نینگ فقط اَیریملری تامانیدن عملگه آشیریلگنی ایتیلگن هجوملرنی اۉز رسمي حساباتلریده تصدیقلهگن.
اوّلراق «افغانستان ملي قرشیلیک جبههسی»، «افغانستان آزادلیک جبههسی» و «یشیل حرکت» تامانیدن عملگه آشیریلگنی ایتیلگن اَیریم هجوملر تصدیقلنگن. بیراق جاري هجري-شمسي ییلده «افغانستان جمهوریتچیلر جبههسی» و «افغانستان بیرلشگن جبههسی» طالبلرگه قرشی حربي عملیاتلرنی باشلهگنینی معلوم قیلیب، بیر قطار هجوملر اوچون جوابگرلیکنی اۉز ذمّهسیگه آلگن.
طالبلر قوراللی مخالف جبههلرنینگ هجوملری یوزهسیدن ایضاح بېرمهیدی. هجوملر عامهوي اخبارات واسطهلریده یاریتیلگن تقدیرده اېسه، اولرنی رد اېتهدی.
