گویان حکومتی امریکادن دېپورت قیلینگن آلتی کیشی افغانستانلیک و کوبالیک مهاجر اوشبو مملکتگه کېلگنینی معلوم قیلدی.
آسوشیتدپرس خبریگه کۉره، گویان تشقی ایشلر وزیری رابرت پرساد بو شخصلر جمعه کونی مملکتگه کیریب کېلگنینی بیلدیرگن.
اونینگ قۉشیمچه قیلیشیچه، گویان حکومتی بو شخصلرنینگ معلوماتلرینی تېکشیرگن، اولرنینگ جنایي تاریخگه اېگه اېمسلیگیگه ایشانچ حاصل قیلگن و شوندن سۉنگ اولرنی قبول قیلگن.
گویان تشقی ایشلر وزیری بو آلتی کیشی مهاجرت مقامی بیلن باغلیق مسألهلر سببلی امریکادن دېپورت قیلینگنینی ایتگن.
پرسادنینگ سۉزلریگه کۉره، گویان حکومتی امریکا بیلن بیر نېچه آی دوام اېتگن مذاکرهلردن سۉنگ اوشبو شخصلرنی قبول قیلیش بۉییچه کېلیشووگه اېریشگن.
اونینگ ایتیشیچه، کېلیشوو بیر ییل دوامیده عمل قیلهدی و بو شخصلرنینگ گویانده دایمي جایلشتیریلیشینی انگلهتمهیدی.
آسوشیتدپرس خبریگه کۉره، حکومت کمهگیدهگی اختیاري قَیتریش دستوری دایرهسیده گویانگه آلیب کېلینگن شخصلر مهاجرت مقامی انیقلنگونگه قدَر اوشبو مملکتده قالهدی. کېینچهلیک اولر اۉز وطنیگه قَیتریلیشی یاکه باشقه دولتگه کۉچیریلیشی ممکن.
گویان رسميلری خلقارا مهاجرت تشکیلاتی اوشبو دستورنی عملگه آشیریش اوچون مسوول اېکنینی معلوم قیلگن. گویان حکومتی اېسه بو شخصلرنینگ تورر جایی یاکه باشقه قۉللب-قوّتلش خرجتلرینی تۉلهمهیدی.
گویان جَنوبي امریکانینگ شِمالی-شرقیده، کریب دېنگیزی منطقهسیده جایلشگن کیچیک دولت بۉلیب، امریکا بیلن اَیریم دېپورت قیلینگن مهاجرلرنی قبول قیلیش بۉییچه کېلیشووگه اېریشگن.
امریکا اَیریم مهاجرلرنینگ ایشلری کۉریب چیقیلگونیگه قدَر اولرنی اوچینچی دولتلردهگی «قَیتریش مرکزلری»ده سقلشگه حرکت قیلماقده و بو بارهده تورلی دولتلر بیلن مذاکرهلر آلیب بارماقده.
