امریکا جمهور رییسینینگ مخصوص نمایندهسی استیو ویتکاف و دونالد ترامپنینگ کویاوی جرد کوشنر، روسيه و اوکراین اۉرتهسیدهگی اوروشنی توگهتیشگه قرهتیلگن سعی-حرکتلر دایرهسیده ایلک بار اوکراین پایتختی کییف شهریگه تشریف بویوردی.
رویترز خبریگه کۉره، امریکا وکیللری بوگون، یکشنبه ۱۵-سنبله مسکودن کییفگه کېلیب، اوکراین جمهور رییسی والادیمیر زلنسکي و باشقه یوقاری مرتبهلی رسميلر بیلن اوچرهشیب، مذاکرهلر اۉتکزگن.
زلنسکي امریکا وکیللری کییفگه یېتیب کېلیشیدن آلدین ایکس ترماغیده مذاکره گروهینینگ اعضالری بیلن دستلبکی ییغیلیش اۉتکزگنینی یازیب، اوکراین اوروشنی توگهتیشنی ایستهیاتگنینی بیلدیرگن.
او شوندهی دېگن: «خوفسیزلیک کفالتلری ضرور. اوروشدن کېین مناسب تینچلیک کېرهک. بیزنینگ تکلیفلریمیز تیارلنگن.»
رویترزگه معلوم بیر منبع نینگ ایتیشیچه، بویوک بریتانيا، فرانسه و آلماننینگ ملي خوفسیزلیک بۉییچه مصلحتچیلری هم یکشنبه کونی کییفده بۉلگن. بیراق اولر امریکا وکیللرینینگ اوکراین رسميلری بیلن اوچرهشوولریده قتنهشگن-قاتنهشمهگنی انیقلشتیریلمهگن.
ترامپنینگ وکیللری واشینگتننینگ اوکرایندهگی اوروشنی توگهتیشگه قرهتیلگن نوبتدهگی سعی-حرکتلری دایرهسیده کېچه روسسيه پایتختی مسکوگه تشریف بویوریب، روسيه جمهور رییسی ولادیمیر پوتین بیلن اوچرهشگن و مذاکره اۉتکزگن.
امریکا وکیللرینینگ مسکوگه تشریفیدن سۉنگ پوتین و ترامپ وکیللرینینگ اوچرهشووینی «آچیق و کانتروکتیف» دېب بهالهگن. بیراق بیاناتده اوروشنی توگهتیشگه تیارلیک بېلگیسی کۉرسهتیلمهگن.
امریکا وکیللرینینگ مسکو و کییفگه تشریفی جمعه کونی دونالد ترامپ اوکرایندهگی اوروشنی توگهتیش بۉییچه ینگی تکلیفی بارلیگینی، بیراق اونینگ تفصیلاتلرینی آشکار قیلمهگنینی ایتگنیدن کېین عملگه آشیریلدی.
امریکا وکیللرینینگ تشریفیدن سۉنگ روسيه و اوکراین رسميلری ایکّی دولت پایتختلریگه اویوشتیریلهدیگن هجوملرنی اوچ کون دوامیده توختهتیشگه کېلیشیب آلدی.
اوکراین پایتختی سۉنگگی هفتهلرده روسيهنینگ کېنگ کۉلملی و کوچلی درون همده راکت هجوملریگه اوچرهگن. اوکراین اېسه مسکودهگی نشانلرگه هجوملر اویوشتیرگن.
اوکرایندهگی اوروش تۉرت یریم ییلدن آرتیق وقتدن بېری دوام اېتماقده. دونالد ترامپ آق اویگه قَیتگنیدن بېری بو اوروشنی توگهتیشینی بیر نېچه بار تأکیدلهگن، بیراق اونینگ حاضرگچه بۉلگن سعی-حرکتلری نتیجه بېرمهگن.
