»ههنگاو» انسان حقوقلری تشکیلاتی ایراننینگ رفسنجان قماقخانهسیده افغانستان وطنداشی «ولیجان نورزایی» نینگ اۉلیم جزاسی اجرا اېتیلگنینی خبر قیلدی.
اوشبو تشکیلات بوگون، یکشنبه 15-سنبله اعلان قیلگن بیاناتیده افغانستان وطنداشینینگ اۉلیم جزاسی اۉتگن هفته چهارشنبه کونی تانگ سحرده ایراننینگ رفسنجان مرکزي قماقخانهسیده اجرا اېتیلگنینی معلوم قیلدی.
«ههنگاو» یازیشیچه، «ولیجان نورزایی» حرکتلنیش امکانیتی چېکلنگن بۉلگن و اونینگ اۉلیم جزاسی معلوللر ارابهچهسیده اجرا اېتیلگن.
تشکیلات خبردار منبعلرگه تهیهنیب یازیشیچه، ولیجان نورزایی اوچ ییل اوّل قصداً آدم اۉلدیریشده عیبلنیب، ایران حکومت کوچلری تامانیدن رفسنجان شهریده تعقیب قیلینگن. او خوفسیزلیک کوچلرینینگ تۉغریدن-تۉغری اۉق اوزیشی عاقبتیده آغیر یرهلنگن و کېینچهلیک حبسگه آلینگن. سۉنگ او اۉلیم جزاسیگه حکم قیلینگن.
«ههنگاو» قۉشیمچه قیلگن: «اۉق تېگیشی نتیجهسیده آلگن جراحتلری شو قدَر آغیر اېدیکی، اوشبو شخص سۉنگگی اوچ ییلنی قماقخانهده معلوللر ارابهچهسیده اۉتکزگن، حرکتلنیش قابلیتینی یۉقاتگن و آخر-عاقبت اونینگ اۉلیم جزاسی هم معلوللر ارابهچهسیده اجرا اېتیلگن.»
تشکیلاتنینگ معلوم قیلیشیچه، ولیجان نورزایی افغانستان غربیدهگی فراه ولایتی مرکزی فراه شهرینینگ اصلی اهالیسی بۉلگن.
ایران حکومتی حاضرگچه اوشبو افغانستان وطنداشینینگ قتل اېتیلگنینی تصدیقلهمهگن.
افغانستانده طالبلر حاکمیتگه قَیتگنیدن سۉنگ، ایران افغانستانلیک محکوملرنی قتل اېتیشنی کۉپهیتیرگن.
ایران انسان حقوقلری تشکیلاتی معلوماتلریگه کۉره، فقط ۲۰۲۵-ییلنینگ اۉزیده ایرانده ۸۴ نفر افغانستان وطنداشی اعدام قیلینگن.
