افغانستان عیاللرینینگ بیرلشگن ملتلر تشکیلاتی ادارهلریده ایشلشیگه قۉییلگن تعقیقنینگ بیر ییللیگی عرفهسیده بیرلشگن ملتلر تشکیلاتی باش کاتبی انتانیو آنتونیو گوترش طالباننی اوشبو تعقیقنی زودلیک بیلن بېکار قیلیشگه همده عیال خادملرنینگ بیرلشگن ملتلر تشکیلاتی ادارهلریگه خوفسیز و تۉسیقلرسیز کیریشینی تأمینلشگه چقیردی.
بیرلشگن ملتلر تشکیلاتی باش کاتبینینگ مطبوعات سوزلاوچیسی استیفان دوجاریک بوگون (یکشنبه، ۱۵-سنبله) بیانات بېریب، گوترش شونینگدېک، طالباننی عیاللر و قیزلرگه نسبتاً جاري اېتیلگن برچه چېکلاولرنی بېکار قیلیشگه همده اولرنینگ افغانستان جمعیتینینگ برچه جبههلریده تۉلیق، تېنگ و مضمونلی اشتراک اېتیش حقوقلرینی قۉللب-قوّتلشگه چقیرگنینی ایتدی.
اونینگ قۉشیمچه قیلیشیچه، بیرلشگن ملتلر تشکیلاتی باش کاتبی طالبلرنینگ افغانستان عیاللری و قیزلریگه نسبتاً آلیب بارهیاتگن کمسیتووچی سیاستیدن چوقور خواطرده. بو سیاستلر اولرنینگ حیاتینینگ برچه جبههلریگه تأثیر کۉرسهتماقده.
بیرلشگن ملتلر تشکیلاتی باش کاتبی، شونینگدېک، عیاللرنینگ جماعت حیاتیده، تعلیمده و کۉپلب ایش ساحهلریده تۉلیق اشتراک اېتیشیگه قۉییلگن چېکلاولر اولرنینگ اساسي حقوقلرینی بوزیشینی، شونینگدېک، اقتصادي رواجلنیش، برقرارلیک و افغانستاننینگ خلقارا همجمعيتگه قَیته انتیگراسیونلشوویگه جدّي تۉسیق بۉلهیاتگنینی تأکیدلهدی.
اېرتهگه، ۷سپتمبر کونی طالبلر تامانیدن افغانستان عیاللرینینگ بیرلشگن ملتلر تشکیلاتی اوچون ایشلشیگه قۉییلگن تعقیق جاري اېتیلگنیگه بیر ییل تۉلهدی. اۉتگن ییلی عیناً شو کونی طالبلر برچه افغانستانلیک عیال خادملرنینگ مملکت بۉیلب بیرلشگن ملتلر تشکیلاتی ادارهلریگه کیریشینی تعقیقلهگن اېدی.
بیرلشگن ملتلر تشکیلاتی باش کاتبی اوشبو چېکلاو خلقارا حقوق، جملهدن، بمت نظامیگه ضد اېکنینی و احتیاجلر هنوز یوقاری بۉلگن بیر پیتده تشکیلاتنینگ اۉز ماموریتینی بجریش همده افغانستان خلقیگه حیاتي مهم و باشقه یاردملرنی یېتکزیش امکانیتینی ضعیفلشتیرهیاتگنینی ایتدی.
اونینگ قۉشیمچه قیلیشیچه، برچه بمت خادملرینینگ اۉز وظیفهلرینی بجریش، شونینگدېک، اهالی نینگ، اینیقسه عیاللر و قیزلرنینگ ضعیف قتلملریگه یاردم و کمک یېتکزیش اوچون ایش جایلریگه تۉسیقلرسیز کیریشی، مدني عرف-عادتلرگه موافق روشده، نهایتده مهمدیر.
آنتونیو گوترش، شونینگدېک، عیاللر و قیزلرگه انسانپرورلیک یاردمی همده ضرور خدمتلرنی یېتکزیب بېره آلیشلرینی تأمینلش ثمرهلی و تمایللرگه اساسلنگن گومانیتار جواب چارهلرینی کۉریش اوچون جوده مهم اېکنینی تأکیدلهدی.
بیرلشگن ملتلر تشکیلاتی بوندن آلدین هم بیر نېچه بار طالباننی افغانستان عیاللرینینگ اوشبو تشکیلات ادارهلریده ایشلشیگه قۉییلگن تعقیقنی بېکار قیلیشگه چقیرگن. بیراق طالبان حاضرگچه بو چقیریقلرگه اعتبار قرهتمهگن.
