کابلدهگی منبعلرگه کۉره، خاتمالنبیین علمی حوزهسینینگ بیر قطار استاد و طلبهلری حبسگه آلینگنی مناسبتی بیلن ییغیلیش اۉتکزماقچی بۉلگن اوچ نفر شیعه نفوذلی شخص طالبان تامانیدن حبسگه آلینگن.
بو واقعهدن خبردار منبع «اطلاعات روز» گزیتهسیگه بېرگن معلوماتیده ایتیشیچه، طالبلر تیناوون (یکشنبه، ۱۵-سنبله) صوفی گردیزی، سید حسن شریفی بلخابی و محمدحسین سنگردوست حبسگه آلگن.
منبعنینگ ایتیشیچه، اوشبو شخصلر خاتمالنبیین علمی حوزهسینینگ بیر قطار استاد و طلبهلری حبسگه آلینگنی مناسبتی بیلن ییغیلیش اۉتکزیش اوچون ۵۰–۶۰ نفرگه یقین شیعه علمالری و جماعت نفوذلی وکیللری «هزاره و شیعه جماعهسی آقسقاللری نینگ خلق بیلن علاقهلر ادارهسی»ده تۉپلنماقچی بۉلگنیدن سۉنگ حبسگه آلینگن. اوشبو ادارهنینگ آشپزی و ایکّی نفر قۉریقچیسی هم حبسگه آلینگن.
منبعنینگ قۉشیمچه قیلیشیچه، «هزاره و شیعه جماعهسی آقسقاللرینینگ خلق بیلن علاقهلر ادارهسی» افغانستان اسلامي خلق بیرلیگی حزبی رهبری محمد محققگه تېگیشلی اویده، «سر کاریز» منطقهسیده فعالیت یوریتگن.
منبعگه کۉره، شیعه علمالری ییغیلیش اۉتکزیب، خاتمالنبیین علمی حوزهسینینگ استاد و طلبهلرینی آزاد قیلیش اوچون طالبلر رسميلری حضوریگه باریشنی رېجهلشتیرگن.
بیراق طالبلر ییغیلیش اۉتکزیلیشیدن آلدین بوندن خبر تاپگن. دستلب طالبلرنینگ کابلدهگی ولایت حاکمی صوفي گردیزيگه، یعنی «هزاره و شیعه جماعهسی آقسقاللری نینگ خلق بیلن علاقهلر ادارهسی» رهبریگه قۉنغیراق قیلیب، اونی ولایت حاکملیگیگه چقیرگن.
منبعنینگ ایتیشیچه، صوفي گردیزي حاکملیک ادارهسیدن طالبلر استخبارات کوچلری تامانیدن دارالامان منطقهسیدهگی اوشبو گروه عدلیه وزیرلیگیگه آلیب کېتیلگن. شوندن سۉنگ اونینگ تیلفونی اۉچیریلگن و علاقهگه چیقمهی قالگن.
منبع طالبلرنینگ کابلدهگی حاکمی صوفي گردیزيگه «عبدالرحمنخان دورینی اونوتمنگ!» دېیه آگاهلنتیرگنینی ایتدی.
«خلق بیلن علاقهلر ادارهسی»دن حبسگه آلینگن بېش کیشی هم طالبلر عدلیه وزیرلیگیگه آلیب کېتیلگن و حاضرگچه آزاد قیلینمهگن.
اولرنینگ مبایل تیلفونلری اۉچیریلگن و حبسگه آلینگنیدن کېینگی تقدیری حقیده هېچ کیم معلوماتگه اېگه اېمس.
بو حالت طالبلر شنبه کونی (۱۴-سنبله) خاتمالنبیین علمی حوزهسیگه کوچ یوباریب، استاد و طلبهلردن اوشبو علمی حوزه بنالرینی بۉشهتیشنی طلب قیلگن بیر پیتده یوز بېرماقده. ناراضیلیکلردن سۉنگ ۲۸ نفر استاد و طلبه حبسگه آلینیب، کابل شهرینینگ اوچینچی خوفسیزلیک حدودیگه آلیب کېتیلگن. «اطلاعات روز» منبعسی حبسگه آلینگنلردن تۉرت نفری آزاد قیلینگنینی، قالگن 24 نفری اېسه هنوز اوچینچی خوفسیزلیک حوزهده حبسده اېکنینی تصدیقلهگن.
طالبلر تیناوون بیر قطار شیعه علمالرینی حبسگه آلگنیدن سۉنگ، اوّل محمد محقق تصرفیده بۉلگن «راه فردا» تلویزیونینینگ فعالیتینی هم توختهتگن.
