کابلدهگی محلي منبعلر طالبلرنینگ عدلیه وزیرلیگی کوچلری خاتم النبیین علمی مدرسهسینی تۉلیق بۉشهتگنینی معلوم قیلماقده.
منبعلرگه کۉره، طالبلر بوگون (دوشنبه، ۱۶-سنبله) ساعت ۱۰:۰۰ گچه طلبهلر و دیني تعلیم آلووچیلرگه اوشبو مدرسهنی ترک اېتیش اوچون مدت بېرگن اېدی. بیراق توشدن کېین اولرنی مجبورن تشقریگه چیقریب یوبارگن.
«اطلاعات روز» گزیتهسیگه یوباریلگن ویدېوده مدرسه طلبهلری اۉز بویوملری بیلن حویلیده تورگنی و او یېردن چیقیب کېتهیاتگنی کۉرینهدی.
منبعلرنینگ ایتیشیچه، حاضرده طالبان فقط اویلری اوشبو مجموعه حدودیده جایلشگن اَیریم مدرسه استادلریگه مدت بېرگن، قالگن برچه شخصلر اېسه تشقریگه چیقریب یوباریلگن.
طالبلرنینگ عدلیه وزیرلیگی کوچلری ایکّی کون آلدین کابلدهگی خاتم النبیین مدرسهسیگه باستیریب کیریب، اونینگ بناسینی قورشب آلگن اېدی.
شوندن سۉنگ محلي منبعلر اوشبو مدرسه۲۸ نفر استادی نینگ هم طالبان تامانیدن حبسگه آلینگنی حقیده خبر بېرگن. حاضرگچه اولرنینگ تقدیری حقیده معلومات یۉق.
طالبلرنینگ عدلیه وزیرلیگی حاضرگچه خاتم النبیین مدرسهسیگه قیلینگن هجوم و اونینگ بۉشهتیلیشی یوزهسیدن رسماً ایضاح بېرمهگن.
طالبان ۱۴۰۳-هجري-شمسي ییلده اوشبو مدرسه دولت یېریده قوریلگنینی دعوا قیلگن اېدی. بیراق مدرسه مسووللری و متصدیلری بو یېر دولتگه تېگیشلی اېمسلیگینی تصدیقلاوچی شرعي و قانوني حجتلرگه اېگه اېکنینی اَیتماقده.
