«افغانستان عدالت و آزادلیک» حزبی طالبلر سیاستی افغانستاندهگی هزارهلر و شیعهلرنینگ موجودلیگی همده امان قالیشینی نشانگه آلگنینی ایتدی.
حزب بوگون (دوشنبه، ۱۶-سنبله) اېرتهلب نشر قیلگن بیاناتیده طالبان کوچلرینینگ خاتم النبیین مدرسهسیگه باستیریب کیریشی همده هراتنینگ جبریل حدودیده هزارهلرگه تېگیشلی بیر قطار دوکانلرنینگ یاپیلیشینی «هزارهلر و شیعهلرنی افغانستاننینگ برچه سیاسي، اجتماعي، مدني و اقتصادي توزیلمهلریدن چیقریب تشلش سیاستی» دایرهسیدهگی حرکت دېب بهالب، قارهلهگن.
«افغانستان عدالت و آزادلیک» حزبی هزاره و شیعه جماعهلرینی «طالبان گروهی نینگ یاووز و ویرانکار سیاستیگه قرشی تۉلیق بیرلیک و همجهتلیک بیلن توریشگه» چقیردی. حزب بو گروه تامانیدن عملگه آشیریلهیاتگن هزارهلر و شیعهلرنی چیقریب تشلش سیاستی گروهلررا مسأله اېمسلیگینی، بلکه هزارهلر و شیعهلرنینگ موجودلیگی همده امان قالیشینی نشانگه آلهیاتگنینی تأکیدلهدی.
حزب سۉنگگی بېش ییل دوامیده شیعه و هزاره جماعهلریگه علاقهدار اَیریم شخصلر همده تشکیلاتلر طالبان سیاستی و خطی-حرکتلرینی اۉزگرتیریش اوچون منتظم روشده حرکت قیلگنینی، بیراق بو بیر تمانلمه اورینیشلر حاضرگچه دېیرلی هېچ قندهی نتیجه بېرمهگنینی ایتدی. حزبنینگ تأکیدلشیچه، طالبان هنوزگچه چیقریب تشلش و تیزیملی کمسیتیش سیاستینی دوام اېتتیرماقده.
«افغانستان عدالت و آزادلیک» حزب «حاضرگچه قندهیدیر طرزده بو گروه بیلن علاقهده بۉلگن برچه شخصلر سلبي قرشیلیک یۉلیگه اۉتیب، بو باسقینچی و ظالم گروه بیلن تۉلیق علاقهنی اوزیشیگه» امید بیلدیردی. حزب، شونینگدېک، اولرنی هزاره و شیعه نامیدن طالبان نینگ ناقانوني حکمرانلیگیگه قانونيلیک و مقبوللیک بېریشده بوندن بویان اشتراک اېتمسلیککه چقیردی.
حزب انسان حقوقلری تشکیلاتلری، بیرلشگن ملتلر تشکیلاتی دیپلوماتیک وکالتخانهلر و خلقارا همجمعیتنی افغانستاندهگی سۉنگگی واقعهلرنی جدّي کوزهتیشگه همده طالبان نینگ کمسیتووچی سیاستی قرشیسیده سکوت سقلهمسلیککه چقیردی.
طالبلرنینگ عدلیه وزیرلیگی کوچلری ایکّی کون آلدین کابلدهگی خاتم النبیین مدرسهسیگه باستیریب کیریب، اونی قورشهب آلگن اېدی. معلوماتلرگه کۉره، اوشبو مدرسه حاضرده تۉلیق بۉشهتیلگن.
بو گروه، شونینگدېک، سۉنگگی کونلرده بیر شخص نینگ ملککه اېگهلیک قیلیش حقیدهگی دعواسی آرتیدن هرات شهرینینگ جبریل شهرچهسیدهگی قریب 100 ته دوکاننی یاپگن و کمیده اوچ کیشینی حبسگه آلگن.
طالبلر افغانستانده قَیته حاکمیتنی اېگهلهگنیدن بویان شیعهلر و هزارهلرگه نسبتاً کېنگ کۉلملی کمسیتووچی و حرکتلرده عیبلنیب کېلماقده.
بو گروه، شونینگدېک، شیعهلرنینگ شخصي حالت تۉغریسیدهگی قانونی همده شیعه مذهبینینگ رسماً تن آلینیشینی بېکار قیلگن. حاضرده شیعهلرنینگ شخصي حالتیگه عاید ایشلرنی حنفی فیقه اساسیده حل قیلماقده.
