بیرلشگن ملتلر تشکیلاتینینگ افغانستان انسان حقوقلری بۉییچه مخصوص گزارشگلری ریچارد بنتنینگ ایتیشیچه، طالبلر افغانستاندهگی انسان حقوقلری حالتی یوزهسیدن خلقارا همجمعيتنینگ «قیزیل چیزیقلری»نی هېچ قندهی عاقبتسیز بوزیب کېلماقده.
بیرلشگن ملتلر تشکلاتی نینگ انسان حقوقلری بۉییچه مخصوص گزارشگری بوگون (دوشنبه، ۱۶-سنبله) بیرلشگن ملتلر تشکیلاتی انسان حقوقلری کېنگشی ییغیلیشیده سۉزلهگن نطقیده طالبلر اۉز چېکلاولری بارهسیده خلق ارا همجمعیتنینگ صبر-طاقت چېگرهلرینی منتظم سینهب کېلهیاتگنینی ایتدی.
اونینگ تأکیدلشیچه، طالبلر بېش ییل دوامیده خلقارا همجعیت تامانیدن اولرنینگ چېکلاولری قارهلنیشی اۉزلری اوچون جوده کم خرجتگه توشیشینی و هېچ قندهی عاقبتلرسیز «قیزیل چیزیقلر»دن اۉتیشلری ممکنلیگینی انگلب یېتگن.
بنت خلقارا همجمعیتگه مراجعت قیلیب: «هر سفر بیز سۉز بیلن ناراضیلیک بیلدیرگنیمیزده، اما اوّلگیدېک حرکت قیلگنیمیزده، بیر خیل خبرنی یوبارهمیز: بو قبول قیلینیشی ممکن اېمس»، دېدی.
او افغانستان خلقینینگ، اینیقسه عیاللر و قیزلرنینگ حقوقلرینی حمایه قیلیشگه قطعي بېل باغلگنینی ایتیب، بیرلشگن ملتلر تشکیلاتی انسان حقوقلری کېنگشی اعضالرینی هم اولرنینگ حقوقلرینی نهفقط سۉز بیلن، بلکه عملي حرکتلر آرقهلی حمایه قیلیشگه چقیردی.
طالبلر افغانستانده حاکمیتنی قَیته قۉلگه کیریتگنیدن بېری مملکت اهالیسینینگ حقوق و اېرکینلیکلریگه، اینیقسه عیاللر و قیزلرگه نسبتاً کېنگ کۉلملی چېکلاولر جاري اېتیب کېلماقده.
جملهدن، بو گروه عیاللر و قیزلرنینگ تعلیم آلیشی همده ایشلشینی تعقیقلهگن، اولرنینگ جمعیتدهگی اشتراکی، جملهدن، طبي خدمتلردن فایدهلنیشیگه هم کېنگ چېکلاولر قۉیگن.
بیرلشگن ملتلر تشکیلاتی مخصصلری طالبلرنینگ افغانستان عیاللریگه نسبتاً سیاستینی «انسانیتگه قرشی جنایت» دېب بهالب، بو سیاست «جنسی آپارتاید» صفتیده هم کۉریلیشی ممکنلیگینی بیلدیرگن.
خلقارا همجمعیت بیر نېچه بار طالباننی افغانستان عیاللریگه نسبتاً چېکلاولرنی، جملهدن، اولرنینگ تعلیم آلیشی و ایشلشیگه قۉییلگن تعقیقنی بېکار قیلیشگه چقیرگن. بیراق طالبلر عیاللر، قیزلر و مملکتنینگ باشقه وطنداشلرینی حقوق همده اېرکینلیکلریگه نسبتاً چېکلاولرنی دوام اېتتیرماقده.
