طالبلرنینگ هرات ولایتی امنیه قوماندانلیگی مطبوعات سۉزلاوچیسی سید مسعود حسینی هرات شهرینینگ ۴-خوفسیزلیک ناحیهسیگه قرهشلی جایده یاش ییگیتنینگ عامه آلدیده آتیب اۉلدیریلیشی بۉییچه گماندارلر انیقلنیب، حبسگه آلینگنینی معلوم قیلدی.
او دوشنبه کونی کېچقورون (۱۶-سنبله) ویدېوده اوشبو شخصلرنینگ ایشی عدلیه و قضایی اۉرگانلریگه یوباریلیشینی ایتگن.
طالبلرنینگ هراتدهگی امنیه قوماندانلیگی مطبوعات سۉزلاوچیسی گماندارلرنینگ سانی و شخصی حقیده باتفصیل معلومات بېرمهگن.
هرات شهریده پیوندچیلیک بیلن شغللنگن ۳۰ یاشلی عبدالقادیر پهلوانزاده جمعه کونی (۱۳-سنبله) ساعت تخمیناً ۵:۰۰ ده هرات شهرینینگ۴-خوفسیزلیک ناحیهسیدهگی «پوسته نمبر یک» محلهسیده جایلشگن نبیزاده یاقیلغی قوییش شاهابچهسیده عامه آلدیده آتیب اۉلدیریلگن.
ییگیتنینگ اۉلدیریلیش جریانی یاقیلغی قوییش شاهابچهسی نینگ کوزهتوو کامرهلری تامانیدن تصویرگه آلینگن ویدېو اجتماعي ترماقلرده ترقهلگن. ویدېولرده بیر نېچه قوراللی اېرکک دستلب ییگیت نینگ قۉللرینی باغلب، اونی کلتکلهگنی، سۉنگره اۉق اوزیب اۉلدیرگنی کۉرینهدی.
ییگیتنینگ آتهسی فرزندی اۉلدیریلگنیدن اوچ کون اۉتیب، ویدېو مراجعت آرقهلی اَیریم ینگی تفصیلاتلرنی معلوم قیلیب، واقعهنی تېرگاو قیلیشنی سۉرهگن.
روستم پهلوانزاده، عبدالقدیرنینگ آتهسی، اۉغلینینگ قۉللرینی باغلب، کېین اونی اۉلدیرگن شخصلر طالبلرنینگ هرات ولایتی پشتون زرغون تومنیدهگی امنیه قوماندانی سید احمد محمدي، اونینگ اوکهسی و مولوي حمید اسملی شخص اېکنینی ایتگن.
روستم پهلوانزاده اۉغلی مولوي حمید تامانیدن اۉلدیریلگنینی دعوا قیلماقده.
اونینگ ایتیشیچه، مولوي حمید آتهسی عبدالقدیر پهلوانزاده تامانیدن اۉلدیریلگنینی دعوا قیلگن. بیراق روستم پهلوانزاده اۉغلی عیبسیز بۉلگنینی و مولوي حمیدنینگ آتهسی بوندن بیر ییلدن کۉپراق وقت آلدین «نامعلوم شخصلر» تامانیدن اۉلدیریلگنینی بیلدیرگن.
روستمنینگ قۉشیمچه قیلیشیچه، مولوي حمید تامانیدن بیلدیریلگن عیبلاولر حقیقتگه تۉغری کېلمهیدی و عبدالقدیرگه قرشی عدلیه همده قضایی اۉرگانلریده هېچ قندهی ایش آچیلمهگن.
طالبلرنینگ هراتدهگی امنیه قوماندانلیگی مطبوعات سۉزلاوچیسی سید مسعود حسینی اوشبو حالت تېکشیریلیشینی ایتگن.
ییگیتنینگ کوندوزی و عامه آلدیده آتیب اۉلدیریلگنی عکس اېتگن ویدېونینگ کېنگ ترقهلیشی، اینیقسه واقعه جاییده طالبلر قوماندانی بۉلگنی حقیده خبرلر پیدا بۉلگنیدن سۉنگ، کېسکین عکسالعمللرگه سبب بۉلگن.
