طالبلر و پاکستان اۉرتهسیدهگی کېلیشماوچیلیکلر دوام اېتهیاتگن بیر پیتده، پاکستان طبیات کېنگشی اوشبو مملکتده طبیات و ستماتولوژی یۉنهلیشلریده تحصیل آلهیاتگن افغانستانلیک محصللر افغانستانگه قَیتیشی کېرهکلیگی حقیده کۉرسهتمه بېردی.
«عرب نیوز» خبریگه کۉره، کېنگش ینگی قراریده افغانستاندن طبیات و ستماتولوژی یۉنهلیشلریگه ینگی محصللرنی قبول قیلیشنی تعقیقلهگن.
نشر معلوماتیگه کۉره، پاکستان طبیات کېنگشی نینگ ۱-سپتمبرده چیقریلگن مکتوبیده: «اوّلراق پاکستاندهگی طبیات یاکه ستماتولوژی دستورلریگه رۉیخطدن اۉتگن افغانستانلیکلر اۉز مملکتلریگه قَیتیشلری شرط»، دېب یازیلگن.
شونینگدېک، کېنگش تعلیم مؤسسهلریگه اوشبو محصللرنینگ پاکستاندن چیقیب کېتیشی اوچون ضرور بۉلگن برچه اداری ایشلرنی عملگه آشیریشنی بویورگن.
پاکستان طبیات کېنگشی جاري اۉقوو ییلیده کېینگی کۉرسهتمهگچه افغانستانلیکلر اوچون ینگی قبول، اۉقیشنی کۉچیریش، تعلیم مهاجرتی یاکه باشقه امکانیتلرگه رخصت بېریلمسلیگینی تأکیدلهگن.
کېنگش مکتوبیده: «بو مسأله اېنگ یوقاری درجهدهگی مهملیککه اېگه و ملي سیاست کۉرسهتمهلری بیلن باغلیق»، دېب قید اېتیلگن.
اوّلراق اسلام آباد عالي محکمهسینینگ بیر محکمهسی پاکستانده افغانستانلیک محصللرنینگ بۉلیشینی شبهه آستیگه قۉییب، پاکستان طالبلر نظارتیدهگی افغانستان بیلن اوروش حالتیده اېکنینی ایتگن اېدی.
«خادمحسین سومرو» محکمه مجلسی وقتیده اوشبو محصللر وکیل مدافعسیگه قرهته: «جناب، حاضر بیز افغانلر بیلن اوروشماقدهمیز. اگر هندستانلیک محصللر کېلسه، اولرگه هم کیریشگه رخصت بېرهسیزمی؟» دېگن.
پاکستان افغانستانلیک طبیات و ستماتولوژی محصللری مملکتدن چیقریلیشی حقیده کۉرسهتمه بېرگن بیر پیتده، ایکّی دولت همده پاکستان و طالبلر اۉرتهسیدهگی مناسبتلر بیر ییلدن آرتیق وقت دوامیده کېسکینلیگیچه قالماقده.
پاکستان حکومتی طالبلر بیلن کېسکینلیک کوچهیگنیدن سۉنگ «ناقانوني» افغانستانلیکلرنی دېپورت قیلیشنی کوچهیتیردی همده مملکتدهگی افغانستانلیک محصللر و باشقهلرنینگ ویزهلرینی اوزهیتیریشدن باش تارتماقده.
