بیرلشگن ملتلر تشکیلاتینینگ انسانپرورلیک یاردملرنی موافقلشتیریش اداره (اوچا) خلقارا سوادخوانلیک کونی مناسبتی بیلن افغانستاندهگی بالهلرنینگ تعلیم آلیشی یۉلیده کۉپلب تۉسیقلر موجودلیگینی تأکیدلهدی.
اوچا ایکسدهگی پیامیده سوادخوانلیک بیلیم، امکانیت و خوفسیز کېلهجک سری اېشیکلرنی آچیشینی یازگن.
اوشبو تشکیلات بو اېشیکلر آچیق قالیشی و هر بیر باله اولغهییب، اۉز صلاحیتینی رۉیابگه چیقریش امکانیگه اېگه بۉلیشی اوچون تعلیمگه دایمي سرمایه کیریتیش ضرورلیگینی تأکیدلهگن.
۸-سپتمبر، یعنی۱۷-سنبله خلقارا سوادخوانلیک کونی. بو سنه افغانستانده ۶-صنفدن یوقاری صنفلرده اۉقيدیگن قیزلر بېش ییلدن بویان مکتب تعلیمیدن محروم بۉلیب کېلهیاتگن بیر پیتده نشانلنماقده.
بیرلشگن ملتلر تشکلاتینینگ افغانستاندهگی یاردم ادارهسی (یوناما) هم خلق ارا سوادخانلیک کونی مناسبتی بیلن بېرگن پیامیده هر بیر انسان اۉقیش و یازیش امکانیتیگه اېگه بۉلیشی کېرهکلیگینی تأکیدلهگن.
یونامانینگ معلوم قیلیشیچه، ۶۰ییلدن بېری خلقارا سوادخونلیک کونینینگ اساسي تمایلی بیر خیل بۉلیب کېلماقده: هر بیر انسان اۉقیش، یازیش، تعلیم آلیش و جمعیتده تۉلهقانلی اشتراک اېتیش حقوقیگه اېگه.
بیراق یوناما معلوماتیگه کۉره، حاضرده۷۳۹ میلیون نفر یاش و کتّه یاشلی انسان حلی هم اساسي سوادخوانلیک کۉنیکمهلریگه اېگه اېمس.
