خلقارا عفو تشکیلاتی پاکستان طبیات کېنگشینینگ افغانستانلیک طبیات و ستماتلوژی محصللری مملکتنی ترک اېتیشی حقیدهگی قرارینی آچیقدن-آچیق «کمسیتووچی» و «اۉزباشیمچهلیک بیلن قبول قیلینگن» دېب اتهب، پاکستاندن اوشبومحصللرگه اۉقیشلرینی یکونلشگه رخصت بېریشنی سۉرهدی.
خلقارا عفو تشکیلاتینینگ جَنوبي آسیادهگی ادارهسی بوگون (سهشنبه، ۱۷-سنبله) کېچقورون نشر قیلگن بیاناتیده بو قرارنینگ عاقبتلری، اینیقسه، محصل قیزلر اوچون جوده آغیر بۉلیشینی بیلدیرگن.
تشکیلاتنینگ قۉشیمچه قیلیشیچه، بو قیزلرنینگ اکثریتی طالبلرنینگ جنسیت اساسیدهگی سیاستی دوام اېتهیاتگنی سببلی اوّل هم افغانستانده عالي تحصیل آلیش امکانیدن محروم بۉلگن. اېندیلیکده اولر اۉقیشنی دوام اېتتیریش و طبیات ساحهسیده کسب اېگهللش اوچون قالگن کم سانلی امکانیتلردن بیرینی هم یۉقاتیش خوفی آستیده.
خلقارا عفو تشکیلاتینینگ یازیشیچه: «بو طلبهلرنینگ اکثریتی طبیات یۉنهلیشیده اۉقیش اوچون کۉپ ییللر صرفلهگن، بیراق اولرنینگ تعلیمی تۉستدن و هېچ قندهی اساسلی سببسیز توختهتیلماقده. اولرنینگ اۉقیشنی باشقه جایده دوام اېتتیریش امیدی اېسه جوده کم.»
تشکیلاتنینگ تأکیدلشیچه، پاکستان خلقارا انسان حقوقلری قانونلریگه موافق، ملتیگه قرهب کمسیتمسدن تعلیم آلیش حقوقینی کفالتلشی شرط.
خلقارا عفو تشکیلاتی پاکستان حکومتیدن «افغانستانلیک محصللر، جملهدن عیاللر و قیزلرگه اۉقیشلرینی یکونلش امکانینی بېرهدیگن انسانپرور و عملي یېچیم» قبول قیلیشنی سۉرهگن.
پاکستان طبیات کېنگشی یقینده پاکستانده طبیات و ستماتلوژی یۉنهلیشلریده تحصیل آلهیاتگن برچه افغانستانلیک محصللر مملکتنی ترک اېتیشی کېرهکلیگی حقیده بویروق چیقرگن.
کېنگش، شونینگدېک، پاکستاننینگ طبیات و ستماتلوژی یونیورسیتیلریگه افغانستاندن ینگی محصللرنی قبول قیلیشنی تعقیقلهگن.
بو قرار افغانستاندن قنچه محصلگه تأثیر قیلیشی و اولرنینگ پاکستاندهگی تحصیلی توگللنمهی قالیشیگه سبب بۉلیشی حاضرچه نامعلوم.
پاکستان حکومتی طالبان بیلن کېلیشماوچیلیکلر کوچهییشی آرتیدن افغانستانلیک فقرالر، جملهدن طلبهلر ویزهلرینی اوزهیتیریش جریانینی توختهتگن و «ناقانوني خارجي فقرالر»نی چیقریب یوباریش حقیده بویروق بېرگن.
اوّلراق افغانستانلیک بیر گروه طلبهلر اسلام آباد عالي محکمهسیگه شکایت بیلن مراجعت قیلیب، ویزهلرینی اوزهیتیریشنی سۉرهگن اېدی. بیراق اۉتگن هفته اوشبو محکمه پاکستان و افغانستان اوروش حالتیده اېکنینی ایتیب، افغانستانلیک محصللرنینگ مملکتده بۉلیشینی شبهه آستیگه قۉیگن.
