ینگی اۉقوو ییلی مملکتنینگ ایسّیق حدودلریده باشلنگن بیر پیتده، جاري ییلده قندهاردهگی دېیرلی برچه دولت مکتبلریده اۉقیتووچیلر یېتیشماوچیلیگی کوزهتیلماقده.
قندهاردهگی «احمد شاه لیسهسی»دهگی بیر منبع نینگ ایتیشیچه، اوشبو مکتبده۱-صنفدن۱۲-صنفگچه اۉقیتووچیلر یېتیشمهیدی.
منبع قندهار شهری و اوشبو ولایت اولسواللیگیدهگی برچه مکتبلرده اۉقیتووچیلر یېتیشماوچیلیگی معماسی موجودلیگینی قۉشیمچه قیلدی.
عینِ پیتده قندهار معارف ریاستی محلي منبعنینگ ایتیشیچه، مالی معمالر سبب جاري ییلده اوشبو ولایتده وقتینچهلیک شرطنامه اساسیده اۉقیتووچیلرنی ایشگه قبول قیلیش هم توختهتیلگن.
منبعنینگ ایتیشیچه، طالبلرنینگ معارف ریاستی برچه مکتبلرگه کېینگی خبرگچه هېچ قندهی شرطنامه اساسیدهگی اۉقیتووچینی ایشگه قبول قیلمسلیک حقیده خبر بېرگن.
قندهار معارف ریاستی مسووللری ینگی اۉقوو ییلیده ۵۰مینگ نفر اۉقووچینی قبول قیلیش امکانیتیگه اېگه اېکنینی و اوشبو اۉقووچیلرنی مکتبلرگه جایلشتیریشلرینی اَیتماقده.
قندهاردن تشقری، افغانستاننینگ بوتون حدودیدهگی مکتبلرده هم اۉقیتووچیلر یېتیشماوچیلیگی معماسی موجود.
طالبلر قیزلرنینگ تعلیم آلیشینی چېکلهگن بیر پیتده، دیني مدرسهلرنی کېنگهیتیرماقده.
طالبلر افغانستانده حاکمیتگه قَیتگنیدن سۉنگ دیني مدرسهلر سانی ۲۰۲۵-ییل سپتامبر آییگه کېلیب 5 مینگدن 23 مینگدن آشگن.
بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ریچارد بنت اۉزینینگ ینگی حساباتیده طالبلر تامانیدن دیني مدرسهلرنینگ کېنگهیتیریلیشی افغانستان نینگ اجتماعي توزیلمهسینی اۉزگرتیریشی ممکنلیگینی ایتگن. او عایلهلرنینگ فرزندلری خلق-اطواریدهگی اۉزگریشلردن خواطر آلهیاتگنی حقیدهگی فکرلرینی اېشیتگنینی بیلدیرگن.
