بیرلشگن ملتلر تشکیلاتینینگ آزیق-طعام و اېکینچیلیک تشکیلاتی (فائو) افغانستانده ۳.۷میلیون باله اۉتکیر تۉییب طعاملنمسلیکدن اذیت چېکهیاتگنینی تأکیدلب، مملکتده بالهلر تۉییب طعاملنمسلیگی دورینی اوزیش اوچون اونینگ آلدینی آلیشگه کۉپراق مبلغ صرفلش ضرورلیگینی ایتدی.
(فائو) بوگون (چهارشنبه، 18-سنبله) نشر قیلگن گزارشیده افغانستاندهگی عملدهگی طعاملنیش دستورلری اساسن اۉتکیر تۉییب طعاملنمسلیکنی دوالش و اونگه بېواسطه تأثیر قیلووچی عامللرگه قرهتیلگنینی بیلدیردی. بیراق بو جریاننی توختهتیش اوچون بالهلرنی تۉییب طعاملنمسلیک خوفیگه دچار قیلهدیگن و دوالنگنیدن کېین ینه اوشبو حالتگه قَیتیشیگه سبب بۉلهدیگن، تیریکچیلیک تیزیملری بیلن باغلیق اساسي عامللر و شرایطلرگه هم اعتبار قرهتیش لازم.
بیرلشگن ملتلر تشکیلاتینینگ آزیق-طعام و ایکینچیلیک تشکیلاتی افغانستانده بالهلر تۉییب طعاملنمسلیگینینگ اساسي عامللری فصللرگه قرهب اۉزگریشینی ایتدی. اولر آزیق-طعام و ایکینچلیک همده چارواچیلیکدن آلینهدیگن درآمدگه کیریش امکانیتی، عیاللرنینگ رۉلی و ایش یوکلمهسی، شونینگدېک، «یگانه سلامتلیک» یاندشووی بیلن باغلیق خوفلرنی اۉز ایچیگه آلهدی.
(فائو) بو عامللرنینگ بیر-بیری بیلن قندهی باغلنیشینی و اولرنینگ بالهلرنینگ آزیقلنیش حالتیگه اۉزارا تأثیرینی توشونیش تۉییب طعاملنمسلیک نینگ آلدینی آلیش بۉییچه ثمرهلی استراتیژيلرنی ایشلب چیقیش اوچون ضرور اېکنینی تأکیدلهدی.
(فائو) حساباتیگه کۉره، افغانستان دنیادهگی اېنگ آغیر آزیقلنیش انقراضلریدن بیریگه دوچ کېلماقده. اۉنلب ییللر دوامیده کۉرسهتیلگن گومانیتار یاردم و عایلهلرنینگ آزیق-طعام خوفسیزلیگینی یخشیلشگه قرهتیلگن سعی-حرکتلرگه قرهمهی، بو یوتوقلر هر دایم هم کیچیک یاشدهگی بالهلرنینگ آزیقلنیش حالتینی یخشیلشگه آلیب کېلمهگن.
(فائو) نینگ ایتیشیچه، بو حالت اۉتکیر تۉییب طعاملنمسلیک نینگ آلدینی آلیش اوچون فقط آزیق-طعامگه اېگه بۉلیشنینگ اۉزی یېترلی اېمسلیگینی و باشقه عامللرگه هم اعتبار قرهتیش کېرهکلیگینی کۉرسهتهدی.
آزیق-طعام خوفسیزلیگینی کومپلېکس تصنیفلش تحلیلیگه کۉره، ۲۰۲۶-ییلده افغانستانده ۶ آیدن ۵۹ آیگچه بۉلگن ۳.۷میلیون باله اۉتکیر تۉییب طعاملنمسلیک حالتیگه دوچ کېلهدی.
تخمیناً بیر آی اوّل افغانستاندهگی جهان آزیق-طعام دستوری مدیری جان آیلیف اوشبو مملکتدهگی تۉییب طعاملنمسلیک بحرانی نظارتدن چیقیب کېتگنینی ایتگن اېدی.
او کابلدن جنېوادهگی ژورنالیستلر بیلن صحبتلشر اېکن، شوندهی دېگن اېدی: «بو کوندن-کونگه یامانلشیب بارهیاتگن بحران و افسوسکی، بیز اونی جلولهی آلمهیهپمیز».
جان آیلیف بالهلرنینگ آزیب کېتیشی – تۉییب طعاملنمسلیک نینگ اېنگ هلاکتلی شکلی – حاضرده افغانستان ولایتلرینینگ اوچدن بیریده بحران درجهسیگه یېتگنینی قۉشیمچه قیلگن اېدی.
بیراق او مبلغ یېتیشمسلیگیدن شکایت قیلیب، جهان آزیق-طعام دستوریده جاري ییلده تۉییب طعاملنمسلیکدن اذیت چېکهیاتگن هر یېتّی کیشیدن فقط بیر نفرینی آزیقلنتیریش اوچون یېترلی مبلغ بارلیگینی ایتگن اېدی.
بیرلشگن ملتلر تشکیلاتی رسميسی افغانستانگه یاردم بېریشنی توختهتگن برچه مملکتلرنی اوشبو بحرانگه قرشی کورهشیش اوچون اۉز یاردملرینی قَیته تیکلشگه چقیرگن اېدی.
