احمدشاه مسعود اۉلدیریلگنینینگ ۲۵ییللیگی مناسبتی بیلن افغانستاننینگ سابق جهاد قوماندانلریدن بیری خاطرلندی. بیر قطار سیاسي آقیملر و رهبرلر اجتماعي ترماقلرده بیاناتلر نشر قیلیب، اونینگ خاطرهسینی یادگه آلدی.
افغانستان نینگ سابق جمهور رییسی حامد کرزی بو مناسبت بیلن نشر قیلگن پیامیده مسعودنی «قهرمان و وطنپرور مجاهد» دېب اتب، اونینگ «جهاد، وطننینگ آزادلیگی اوچون حرکت و خلق آرهسیده بۉلگنی اوچون حرمتگه لایق» اېکنینی ایتدی.
ملي یرهشوو عالي کېنگشینینگ سابق رئیسی عبدالله عبدالله هم اۉز پیامیده مسعودنی «افغانستاننینگ صادق و فدایی فرزندی» دېب اتهدی. اونینگ ایتیشیچه، مسعود «خلق و وطن آلدیدهگی مسوولیتینی انگلهگن حالده، دایما اوزاقنی کۉزلب، شخصي، گروهي و قبیلهوي منفعتلردن کۉره عمومي منفعتلرنی اوستون قۉیگن».
عبداللهنینگ قۉشیمچه قیلیشیچه، احمدشاه مسعود «افغانستاندهگی قرداش و تېنگ اېلتلر اۉرتهسیدهگی بۉلینیش، پراکندهلیک و ایشانچسیزلیکنی خلق و مملکتنینگ عمومي مغلوبیتیگه سبب بۉلووچی عامل دېب بیلگن همده حیاتینینگ سۉنگگی کونیگچه تورلی اېلتلر اۉرتهسیده بیرلیک و یکدللیکنی تأمینلش یۉلیده صبر و متانت بیلن تینمهی حرکت قیلگن».
«افغانستان آزادلیکجبههسی» هم مسعودنینگ شوروی اتفاقی و طالبانگه قرشی اوروشدهگی اشتراکیگه توختهلیب، او «شوروی قیزیل اوردوسینینگ باسقینی، کېینچهلیک اېسه طالبان تروریزمی و استبدادیگه قرشی جسارت و عاقلانه باشقروو بیلن کورهشگنینی، آزادلیک اوچون کورهشیش، مستقللیکنی حمایه قیلیش همده تجاوز، باسیب آلیش و ظلمگه بۉیسونمسلیک یۉلینی میراث قالدیرگنینی» تأکیدلهدی.
جبههنینگ قید اېتیشیچه، «طالبلرنینگ ناقانوني حاکمیتگه قَیتگنیگه بېش ییل بۉلگن حاضرگی شرایطده شهید احمدشاه مسعودنینگ قرشیلیک کۉرسهتیش یۉلی و کورهش غایهلری هر قچانگیدن هم مهم اهمیت کسب اېتماقده. بو میراث بوگونگی اولادنی آزادلیک، عدالت و اۉز تقدیرینی اۉزی بېلگیلش حقوقیگه اېریشیش یۉلیده قرشیلیک کۉرسهتیش و فداییلیککه چارلهماقده».
احمدمسعود تامانیدن تشکیل اېتیلگن «افغانستان ملي مقاومت جبههسی» اېسه اونینگ اۉلدیریلیشینی «افغانستان زمانهوي تاریخیدهگی بوریلیش نقطهسی» دېب اتهدی. جبههنینگ ایتیشیچه، بو قیغولی واقعه «آزادلیککه اینتیلیش، انسان قدر-قیمتینی حمایه قیلیش و اجتماعي عدالتگه اېریشیش اوچون حرکتنی مملکتنینگ برچه فقرالری اوچون عمومي و تاریخي مسوولیتگه ایلنتیرگن».
جبهه شونینگدېک، «بوگون طالبلر ترورچی گروهینینگ ظالمانه حکمرانلیگی شرایطیده ملي قهرماننینگ غایهلری و یوکسک آرزولری هر قچانگیدن هم کۉپراق انگلنماقده. طالبلرنینگ ینه حاکمیتگه کېلیشی نهفقط مسعودنینگ کورهشیگه بۉلگن ساغینچنی کوچهیتیردی، بلکه اونی تاریخدهگی تنیقلی شخصدن ملي قرشیلیک رمزی و بوتون بیر خلقنینگ عمومي آرزوسیگه ایلنتیردی»، دېب بیلدیردی.
احمدشاه مسعود یېتکچی اعضالریدن بیری بۉلگن افغانستان اسلام جمعیتی حزبی هم نشر قیلگن پیامیده اونی «متانتلی کورهشچی، جسور و معتدل فکرلی انسان» دېب تعریفلهدی.
حزب احمدشاه مسعود «دیندارلیک و فقرالیک جمعیتی اۉرتهسیدهگی باغلیقلیک، عملي تقوا و اجتماعي همده سیاسي ساحهلرده اخلاققه اساسلنگن سیاست ضرورلیگیگه اورغو بېرگنینی» ایتدی.
افغانستان اسلام جمعیتی حزبینینگ تأکیدلشیچه، مسعود «دموکراتیک، برقرار، فراوان و خیلمه-خیل افغانستان اوچون کورهشگن. عدالتنی تأمینلش، خلقنینگ اساسي اېرکینلیکلرینی حمایه قیلیش و برچه فقرالرنینگ اشتراکیگه اساسلنگن سیاسي تیزیمنی یرهتیشنی اۉز کورهشی همده اسلام جمعیتی سیاسي حرکتینینگ اساسي تمایللریدن دېب بیلگن. بوندهی تیزیمده افغانستان خلقی اېتنیک و دیني کمسیتیشلرسیز، استبداد و زۉرآورلیکدن خالی حالده بیرگهلیکده یششی کېرهک اېدی».
احمدشاه مسعود ۲۴ ییل اوّل عیناً شو کونی القاعده بیلن باغلیق ایکّی هجومچی تامانیدن تخارنینگ خواجه بهاوالدین تومنیده اۉلدیریلگن. افغانستاننینگ اوّلگی حکومتی اونگه «ملي قهرمان» عنوانینی بېرگن.
اوّلگی ییللرده اونینگ اۉلدیریلگن کونی مناسبتی بیلن کابل و افغانستان نینگ تورلی ولایتلریده کتّه خاطره تدبیرلری اۉتکزیلر اېدی. بیراق طالبلر حاکمیتگه قَیتگچ، مملکت ایچیده بوندهی تدبیرلر اۉتکزیلمهیپتی.
طالبلر افغانستانده ینه حاکمیتنی قۉلگه کیریتگنیدن سۉنگ، پنجشیردهگی احمدشاه مسعود مقبرهسینی هم ویران قیلگن.
