انسان حقوقلری تشکیلاتی پاکستان حکومتیدن افغانستانلیک محصللرنی طبیات یۉنهلیشلریگه قبول قیلیشگه قۉییلگن «کمسیتووچی تعقیق»نی بېکار قیلیشنی و اولرگه اۉقیشلرینی دوام اېتتیریشگه رخصت بېریشنی سۉرهدی.
اوشبو تشکیلات بوگون (پنجشنبه، ۱۹-سنبله) بیانات نشر قیلیب، پاکستان رسميلری افغانستانلیک طلبهلر قانوني روشده مملکتده قالیب، تعلیملرینی یکونلشلری ممکنلیگیگه کفالت بېریشی کېرهکلیگینی تأکیدلهدی.
انسان حقوقلری تشکیلاتی هر بیر محصلنینگ حمایهگه بۉلگن احتیاجی علیحده بهالنیشی لازملیگینی بیلدیرگن. تشکیلات، اینیقسه، طالبلر تعقیب و تضییقلریگه کۉپراق دوچ کېلیش خوفی موجود بۉلگن عیاللر اوچون ضرور حاللرده خوفسیز باشپناه تأمینلنیشی کېرهکلیگینی قید اېتگن.
پاکستان طبیات کېنگشی مملکتدهگی برچه طبیات و ستماتولوژی مؤسسهلریگه افغانستانلیک محصللرنی افغانستانگه قَیتریش اوچون ضرور چارهلرنی کۉریش حقیده کۉرسهتمه بېرگن. کېنگش، شونینگدېک، افغانستانلیک محصللرنی طبیات یۉنهلیشلریگه قبول قیلیشنی هم تعقیقلهگن.
اوشبو کۉرسهتمهدن سۉنگ لاهوردهگی طبیات بیلیم یورتی ۲۰ نفر افغانستانلیک طبیات محصلنی، جملهدن، تۉرت نفر عیال و یېتّی نفر بیتیرووچی کورس محصلنی، ۲۴ساعت ایچیده چیقیب کېتیش جریانلرینی یکونلش اوچون مراجعت قیلیشلری کېرهکلیگینی بیلدیرگن.
پاکستاننینگ ناحکومت انسان حقوقلری کمیسیونی حساب-کتابیگه کۉره، لاهورده طبیات و ستماتولوژی یۉنهلیشلریده تحصیل آلهیاتگن قریب ۱۰۰۰نفر افغانستانلیک محصل اوشبو قراردن تأثیرلنیشی ممکن. اولر نینگ ۲۰ نفردن ۴۰نفرگچهسی عیاللردیر.
انسان حقوقلری تشکیلاتی افغانستانلیک قیز محصللرنی افغانستانگه چیقریب یوباریش اولرنینگ داکتر یاکه ستماتولوژی بۉلیش امکانیتیدن محروم بۉلیشینی انگلهتیشینی تأکیدلهگن. چونکه طالبان عیاللرنینگ بیلیم یورتلرده تحصیل آلیشی همده طبیات ساحهسیده تعلیم آلیشلرینی تعقیقلهگن.
اوشبو تشکیلات پاکستان اقتصادي، اجتماعي و مدني حقوقلر تۉغریسیدهگی خلقارا میثاق اعضا دولت صفتیده عالي تعلیم آلیش امکانیتیدن تېنگ فایدهلنیشنی قابلیب و ملَکه اساسیده، هېچ قندهی کمسیتیشسیز تأمینلشی شرطلیگینی تأکیدلهگن.
