افغانستانده سرطان کسللیگیگه قرشی کورهش جمغرمهسی مملکتده حاضرده ۱.۵میلیوندن آرتیق کیشی سرطان کسللیگیگه چهلینگنینی معلوم قیلدی.
حاضر طالبلر نظارتی آستیده فعالیت یوریتهیاتگن ملي تلویزیونی شنبه کونی (۲۱-سنبله) ییلیگه ۵۰مینگ کیشیگه سرطان تشخیصی قۉییلهیاتگنی حقیده خبر بېردی.
افغانستانده سرطان کسللیگیگه قرشی کورهش جمغرمهسی رهبری شفیق شینواری حاضرده مملکتده ۱.۵میلیوندن آرتیق کیشی سرطان کسللیگیگه چهلینگنینی ایتگن.
اونینگ قۉشیمچه قیلیشیچه، هر ییلی مملکتده قریب ۵۰ مینگته ینگی سرطان حالتی انیقلنهدی.
شینواری ملي تلویزیونیگه بېرگن صحبتیده عیاللر آرهسیده کۉکرک و بچهدان سرطانی، اېرککلر آرهسیده اېسه اۉپکه، آشقازان و ایچک سرطانی افغانستانده اېنگ کۉپ اوچرهیدیگن سرطان تورلریدن اېکنینی ایتگن.
اونینگ سۉزلریگه کۉره، یورهک-قان تامیر کسللیکلریدن کېین سرطان افغانستانده اۉلیم نینگ مهم سببلریدن بیری حسابلنهدی.
عینِ پیتده طالبان نینگ ساغلیقنی سقلش وزیرلیگی مطبوعات سوزلاوچیسی شرافت زمان امرخیل سرطان کسللریگه خدمت کۉرسهتیش اوچون هر بیر زونده ۵۰ اۉرینلی بیرته شفاخانه همده کابلده ۲۰۰ اۉرینلی بیرته شفاخانه فعالیت یوریتهیاتگنینی ایتگن.
او ملي تلویزیونیگه بېرگن صحبتیده اۉتگن ییلی اوشبو گروه ساغلیقنی سقلش وزیرلیگی تصرفیدهگی شفاخانهلرده قریب 90 مینگ نفر سرطان بېماری رۉیخطگه آلینگنی و اولرگه خدمتلر کۉرسهتیلگنینی معلوم قیلگن.
سرطان بۉییچه متخصصلردن بیری رحیم گل درویش ملي تلویزیونیگه بېرگن انترویسیده سگرت و ناس استعمال قیلیش، گیگیینه قاعدهلریگه رعایه قیلمسلیک همده ناتۉغری طعاملنیش افغانستانده سرطان کسللیگیگه چهلینیش نینگ اساسي عامللریدن اېکنینی ایتگن.
شرافت زمان امرخیل گیاهوند مادّهلر استعمالی و ناتۉغری طعاملنیشدن تشقری، مملکتدهگی اوزاق دوام اېتگن اوروشلرنی هم سرطان کسللیگی کۉپهییشی نینگ مهم عامللریدن بیری دېب اتهگن.
اونینگ ایتیشیچه، بیر نېچه اۉن ییللیک اوروشلر دوامیده افغانستانده تورلی خیل اۉق-داریلر قۉللنگن و بو سرطان کسللیگی نینگ پیدا بۉلیشی همده ترقهلیشیگه تأثیر کۉرسهتگن.
بو حالتگه قدَر، ۲۰۲۰-ییلگچه افغانستان اسلام جمهوریتی نینگ ساغلیقنی سقلش وزیرلیگی اۉز حساباتلریده سرطان کسللیگی نینگ ینگی حالتلرینی ییلیگه قریب ۲۰مینگ نفر دېب بهالهگن اېدی.
