ایران عامهوي اخبارات واسطهلرینینگ خبر بېریشیچه، اوشبو مملکتنینگ کهگیلویه و بویراحمد ولایتیده صادر بۉلگن ترافیک حادثهسی عاقبتیده کمیده یېتّی کیشی، جملهدن، تۉرت نفر افغانستانلیک هلاک بۉلگن، ینه اوچ کیشی جراحتلنگن.
ایسنا خبریگه کۉره، حادثه تیناوون (شنبه، ۲۱-سنبله) کېچقورون «دنا» اولسواللیگیده، یاسوچ-اصفهان یۉنهلیشیده صادر بۉلگن. جراحتلنگنلرنینگ احوالی هم آغیر اېکنی ایتیلماقده.
کهگیلویه و بویراحمد ولایتی پولیسی باشلیغی حسن دانيارنینگ ایتیشیچه، دستلب تۉقّیز نفری افغانستانلیک بۉلگن ۱۰کیشینی آلیب کېتهیاتگن «پژو ۴۰۵» موتر یۉلدن چیقیب، ۱۸غیلدیرهکلی یوک موتریگه اوریلگن.
اونینگقۉشیمچه قیلیشیچه، شوندن سۉنگ «پژو پارس» روسوملی موتر تۉقنهشوو جاییگه اوریلمسلیک اوچون یۉنهلیشینی اۉزگرتیریب، یۉل چېتیدهگی تېپهلیککه باریب اوریلگن.
حادثهگه افغانستان فقرالرینی آلیب کېتهیاتگن موترنینگ یوقاری تېزلیکده حرکتلنگنی و باشقه اتوموبیللرنی قوویب اۉتیشگه اورینگنی سبب بۉلگنی ایتیلماقده.
حادثه قربانلری بۉلگن افغانستانلیکلرنینگ ایراندهگی یشش مقامی حاضرچه نامعلوم.
اوّل هم افغانستانلیکلرنینگ ایرانگه ناقانوني یۉل بیلن کیریشگه اورینیش وقتیده ترافیک حادثهلریده هلاک بۉلگنی حقیده کۉپلب خبرلر ترقهلگن.
