افغانستان اسلامي جنبش حزبی رهبری عبدالرشید دوستم مملکتده «ینه-ده کۉپ قان تۉکیلیشینینگ آلدینی آلیش» اوچون طالبلر مذاکرهلرگه راضی بۉلیشی کېرهکلیگینی ایتدی.
دوستم بوگون (یکشنبه، ۲۲-سنبله) «شهیدلر هفتهلیگی» مناسبتی بیلن اۉتکزیلگن آنلاین ییغیلیشده سۉزلر اېکن، طالبلرگه قرشی تامانلرنینگ مذاکره هیئتلری مذاکرهلرگه تیار اېکنینی بیلدیردی.
افغانستان ملي جنبش حزبی رهبری، شونینگدېک، طالبلر سیاستیگه توختهلیب، حاضرگی وضعیت دوام اېتمسلیگینی و بو گروهگه قرشی «قوراللی جبههسیلر» سانی ینه-ده کۉپهییشینی ایتدی.
او، شونینگدېک، خلق طالبانگه قرشی قۉزغآلان کۉتریشی اوچون یگانه آواز و یگانه رهبریتگه احتیاج بارلیگینی تأکیدلهدی همده طالباننی وضعیت نظارتدن چیقیب کېتیشیگه سبب بۉلهدیگن حرکتلردن تيیلیشگه چقیردی.
طالبان افغانستانده قَیته حاکمیتنی قۉلگه آلگنیدن بېری بیر نېچه بار اۉزیگه قرشی سیاستچیلرنی افغانستانگه قَیتیشگه و گروه حکمرانلیگی آستیده «نارمل حیات» کېچیریشگه چقیرگن.
بیراق بو گروه افغانستاننینگ تقدیری و کېلهجگی مسألهسیده مخالفلری بیلن هر قندهی مذاکرهنی رد اېتیب کېلهدی و اۉز حکومتی یېترلیچه «همه اوچون آچیق» فراگیر اېکنینی دعوا قیلهدی.
