بیرلشگن ملتلر تشکیلاتینینگ گیاهوند مادّهلر و جنایتچیلیک بۉییچه ادارهسی افغانستانده کۉکناری یېتیشتیریشگه مقابل صفتیده زعفران و گل محمدی یېتیشتیریشنی ترغیب قیلهیاتگنینی معلوم قیلدی.
اوشبو تشکیلات بوگون (دوشنبه، ۲۳-سنبله) خ اجتماعي ترماغیده اعلان قیلگن خبریده بو دستور حاضرده ایتالیا حکومتی مالی کمهگیده ننگرهار و هرات ولایتلریده عملگه آشیریلهیاتگنینی بیلدیردی.
بیرلشگن ملتلر تشکیلاتینینگ گیاهوند مادّهلر و جنایتچیلیک بۉییچه ادارهسی معلوماتیگه کۉره، مذکور ولایتلردهگی دهقانلر آرهسیده کۉکناریگه مقابل صفتیده گل محمدی و زعفران یېتیشتیریش همده اولرنی قَیته ایشلش ترغیب قیلینماقده.
شونینگدېک، دهقانلرگه قیشلاق خۉجهلیگی و چارواچیلیک بیلن باغلیق کۉنیکمهلر، جملهدن، جون ییگیریش، ایپک توقیش و سبزواتلرنی قَیته ایشلش بۉییچه هم تعلیم بېریلماقده.
افغانستانده گیاهوند مادّهلرنی یېتیشتیریش، ایشلب چیقریش و ساتیش، جملهدن، اوندن افیون آلینهدیگن کۉکناری یېتیشتیریش جمهوریت دوریده تعقیقلنگن اېدی. بیراق حکومت نظارتیدن تشقریدهگی و طالبان نظارتی آستیدهگی حدودلرده بو فعالیت دوام اېتگن.
طالبان افغانستانده حاکمیتنی قَیته قۉلگه کیریتگنیدن سۉنگ، ۲۰۲۲-ییلده گیاهوند مادّهلرنی یېتیشتیریش، ایشلب چیقریش و ساتیشنی تعقیقلهگنینی اعلان قیلگن.
بیرلشگن ملتلر تشکیلاتی معلوماتیگه کۉره، طالبلرنینگ اوشبو فرمانی افغانستانده کۉکناری یېتیشتیریشنی 95 فایزگچه کمهیتیرگن. بیراق دهقانلر اوچون مقابل اېکینلرنینگ یېترلی اېمسلیگی و کۉکنارینینگ ساتووچیلر اوچون یوقاری درآمد کېلتیریشی گیاهوند مادّهلر اېکیلهدیگن میدانلرنی بوتونلهی یۉق قیلیشگه تۉسقینلیک قیلماقده.
