استرالیا یېتکرمهلرینینگ خبر بېریشیچه، افغانستان وطنداشی عامهوي آتیشمه و گرودهگیلرنینگ باشینی کېسیش کبی اېکسترمیستیک و زۉرآورلیک مضمونیدهگی ویدېولرنی سهقلهگنی اوچون حبسگه آلینگن.
«ایبیسی» تلویزیونینینگ خبریگه کۉره، گماندار ۳۰ یاشلی محمد احمدزی بۉلیب، او افغانستانگه سفر قیلیش اوچون یۉلگه چیققن پیتده شنبه کونی (۲۱-سنبله) ملبورن هوا میدانیده حبسگه آلینگن.
اوشبو یېتکرمه معلوماتیگه کۉره، تېرگاوچیلر اونینگ مبایل تیلفونیدن اېکسترمیستیک و زۉرآورلیک مضمونیدهگی ماتریاللر، جملهدن، عامهوي آتیشمه و گرودهگیلرنینگ باشینی کېسیش عکس اېتگن ویدېولرنی انیقلهگن.
آسترلیا فدرال پولیسی احمدزی باشقه اېرککلر بیلن بیرگه اېکسترمیستیک و زۉرآورلیک مضمونیدهگی ماتریاللرنی بهم کۉرگن چت گروهینینگ اعضاسی بۉلگنینی معلوم قیلگن.
محمد احمدزی حاضرده آسترلیانینگ ویکتوریا ایالتی مرکزی ملبورن شهرینینگ شمالي قِسمیده یشهیدی.
او حبسگه آلینگن پیتده خوفسیزلیک خادملریگه آتهسینی کۉریش اوچون افغانستانگه باریشنی رېجهلشتیرگنینی ایتگن.
مبایل تیلفونینی هوا میدانی چېگرهچیلری تېکشیریشیگه دستلب قرشیلیک کۉرستگن محمد احمدزی «اېکسترمیستیک و زۉرآورلیک مضمونیدهگی ماتریاللرنی سقلش» همده «پولیس نینگ الکترون قوریلمهگه کیریشیگه تۉسقینلیک قیلیش» عیبلاولری بیلن حبسگه آلینگن.
احمدزی یکشنبه کونی توشدن کېین ویدېومولاقات آرقهلی بدوی ملبورن محکمهسیده اشتراک اېتگن.
احمدزی گرو عوضیگه وقتینچه آزاد قیلینیشینی سۉرهگن، بیراق محکمه اونینگ مملکتنی ترک اېتیش امکانیتیگه اېگه بۉلمسلیگی اوچون بو طلبنی معقولهمهگن.
اونینگ ایشی قۉشیمچه کۉریب چیقیش اوچون اېرتهگه (سهشنبه، ۲۴-سنبله) ینه محکمهده کۉریب چیقیلیشی کوتیلماقده.
