طالبلرنینگ تشقی ایشلر وزیری امیرخان متقی عیاللر و قیزلرنینگ تعلیم آلیشینی بېش ییلدن آرتیق وقت دوامیده تعقیقلب کېلینهیاتگنینی «کیچیک معما» دېب اتهب، افغانستانده دنیا اعتبار قرهتیشی کېرهک بۉلگن باشقه اۉزگریشلر هم یوز بېرگنینی ایتدی.
طالبلر تشقی ایشلر وزیری بیبیسی بیلن صحبتده افغانستاندهگی عیاللر مسألهسیگه غرب مدنیتی و عنعنهلری نقطهٔ نظریدن قرهش کېرهک اېمسلیگینی، «افغانستان مدنیتی و قدریتلری» هم انابتگه آلینیشی لازملیگینی تأکیدلهدی.
اونینگ دعوا قیلیشیچه، افغانستاندهگی عیاللرنینگ احوالی غربده تصور قیلینهیاتگنی و عامهوي اخبارات واسطهلریده یاریتیلهیاتگنی کبی «یامان اېمس». اونینگ ایتیشیچه، کابل و باشقه شهرلرده عیاللر ایشلهیدی و بیزنس بیلن شغللنهدی، باشلنغیچ مکتبلر همده دیني مکتبلرده تعلیم آلهدی.
اونینگ سۉزلریگه کۉره، حاضرده قریب اوچ میلیون عیال و قیز باشلنغیچ مکتبلر همده دیني مکتبلرده تعلیم آلماقده و بو جریان دوام اېتماقده.
متقی قیزلرنینگ آلتینچی صنفدن یوقاری باسقیچلرده تعلیم آلیشیگه قۉییلگن تعقیق حقیده گپیرر اېکن، «البته، اَیریم مسألهلرده کیچیک فرقلر بۉلیشی ممکن، اما افغانستانده دنیا اعتبار قرهتیشی کېرهک بۉلگن باشقه اۉزگریشلر هم بار. گیاهوند مادّهلرنی یېتیشتیریش نال درجهگه توشدی، خوفسیزلیک تأمینلندی و باشقه مملکتلرگه ضرر یېتکزیشی ممکن بۉلگن گروهلر یۉق قیلیندی. افغانستانده کۉپلب واقعهلر صادر بۉلماقده و اولر بارهسیده دنیا بیلن همکارلیک قیلیشیمیز ممکن»، دېدی.
صحبت دوامیده ژورنالیست طالبان تشقی ایشلر وزیریدن قیزلرنینگ آلتینچی صنفدن یوقاری باسقیچلرده تعلیم آلیشیگه قۉییلگن تعقیق دوام اېتسه، کېلهجکده افغانستانده شفاکار، اۉقیتووچی و باشقه کۉپلب ساحهلرده عیال متخصصلر یېتیشماوچیلیگی یوزهگه کېلیشی ممکنلیگینی سۉردی. ژورنالیست بو حقیقتاً هم معما اېمسمی و طالبان بونگه اعتبار قرهتهدیمی، دېیه سوال بېردی.
متقی جوابن، حاضرده افغانستانده بوندهی یېتیشماوچیلیک موجود اېمسلیگینی و کېلهجکده هم بوندهی معماگه دوچ کېلمسلیک اوچون حرکت قیلینهیاتگنینی ایتدی. اونینگ تأکیدلشیچه، اگر بو ساحهده ملَکهلی کادرلر یېتیشماوچیلیگی یوزهگه کېلیب، مسأله حقیقي معماگه ایلنسه، اونی کۉریب چیقیشهدی.
طالبلر افغانستانده حاکمیتنی قَیته قۉلگه کیریتگنیدن سۉنگ، آلتینچی صنفدن یوقاری صنفلرده اۉقيدیگن قیزلرنینگ مکتبگه باریشینی تعقیقلهدی. کېینچهلیک بو گروه یونیورسیتیلر و طبیات انستیتوتلرینی هم عیاللر و قیزلر اوچون یاپدی.
بیرلشگن ملتلر تشکیلاتی آماری معلوماتلریگه کۉره، طالبلرنینگ بو سیاستی افغانستانده قریب 2،5 میلیون عیال و قیزنینگ تعلیمدن محروم بۉلیشیگه سبب بۉلگن.
طالبلر دستلب عیاللرنینگ تعلیم آلیشی و اۉقیشینی «ایکّینچی خبرگچه» تعقیقلهگنینی بیلدیرگن اېدی. بیراق آرهدن بېش ییل اۉتگن بۉلسه-ده، تعقیق همان دوام اېتماقده. طالبان رسميلری اېسه بو مسألهنی اهمیتسیز کۉرسهتیشگه و اونی «افغان و اسلامي مدنیت همده قدریتلر» بیلن باغلشگه اورینماقده.
افغانستان خلقی، بیرلشگن ملتلر تشکیلاتی و دنیا مملکتلری شو وقت دوامیده بیر نېچه بار افغانستان عیاللرینینگ تعلیم آلیشی و ایشلشیگه قۉییلگن تعقیقنی بېکار قیلیشگه چقیردی. بیراق طالبان هنوزگچه بو چقیریقلرگه اعتبار بېرمهی کېلماقده.
