کابلدهگی منبعلر طالبلرنینگ عدلیه وزیری عبدالحکیم شرعی «شیعهلر عالی کمیسیونی» رئیسی و اعضالرینی اۉزینینگ شخصي قماقخانهسیده سقلهیاتگنینی معلوم قیلدی.
«اطلاعات روز» گزیتهسیگه منبع بېرگن معلوماتگه کۉره، محمد علی اخلاقي، سید نادرشاه بحر، حاجی امیر محمد بازیل، سید محسن حسینی و سید عبدالله هاشیمي تیناوون (یکشنبه، ۲۲-سنبله) عدلیه وزیرلیگی بناسینینگ اۉزیده حبسگه آلینگن.
منبعنینگ ایتیشیچه، بو شخصلر بیر هفته اوّل طالبلر عدلیه وزیری تامانیدن حبسگه آلینگن شیعه جماعهسی نینگ نفوذلی وکیللرینی آزاد قیلیش اوچون واسطهچیلیک قیلیش مقصدیده وزیرلیککه بارگن.
منبع اولرنینگ حبسگه آلینیشیگه سبب صفتیده طالبلر عدلیه وزیرینینگ «شیعهلر عالی کمیسیونی»نی سیاسي و استخبارات تشکیلاتی دېب اتهگنی همده اونینگ فعالیتینی ناقانوني دېب حسابلهگنینی کېلتیردی.
منبع نینگ سۉزلریگه کۉره، طالبلر عدلیه وزیری بو گروه حکمرانلیگی آستیده هېچ قندهی سیاسي تشکیلاتنینگ فعالیت یوریتیشیگه رخصت بېریلمسلیگینی ایتگن.
«شیعهلر عالی کمیسیونی» طالبلر استخباراتی تامانیدن تشکیل اېتیلگنی ایتیلهدیگن تشکیلاتدیر.
اۉتگن هفته منبعلر طالبان کوچلری کابلنینگ کارته چهار منطقهسیده جایلشگن «افغانستان شیعهلر عالی کمیسیونی» ادارهسینی قورشب آلگنی حقیده خبر بېرگن اېدی.
منبع محمد علی اخلاقي، اوشبو کمیسیون رئیسی، طالبان عدلیه وزیرینینگ نظارتی آستیده سقلنهیاتگنینی تأکیدلهدی.
طالبلر عدلیه وزیری اۉتگن هفته هم شیعه جماعهسینینگ بیر نېچه نفوذلی وکیلینی حبسگه آلگن. منبعگه کۉره، اولردن ایکّی نفری کېچه، قالگنلری اېسه بوگون آزاد قیلینگن.
عبدالحکیم شرعینینگ عدلیه وزیرلیگیده شخصي قماقخانهسی بارلیگی و او بیر نېچه بار تورلی شخصلرنی، جملهدن، شیعه جماعهسی آقسقاللرینی حبسگه آلیب، قماققه تشلهگنی ایتیلهدی.
یقینده هزاره و شیعه جماعهلری وکیللری بیانات بېریب، اوشبو جماعه سۉنگگی بېش ییل دوامیده طالبلر عدلیه وزیرلیگی تامانیدن اعتبارسیز مناسبتگه اوچرهگنینی ایتگن اېدی. اولر طالبان مأموریتیدن عبدالحکیم شرعينینگ بو کبی حرکتلریگه چېک قۉییشنی سۉرهگن.
