بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش صندیغی ۲۰۱۶–۲۰۲۵-ییللر آرهلیغیده مهاجرلرنینگ اۉز مملکتلریدهگی عایلهلریگه یوبارهیاتگن پول مبلغلری ۹۴فایزگه آشگنینی معلوم قیلدی. بو کۉرستکیچ مهاجرلرنینگ اوشبو مملکتلردن کېتیشی ۲۸ فایزگه آشگنیدن انچه یوقاری.
گزارشگه کۉره، قریب ۲۲۰ میلیون مهاجر همده مهاجرلر و دیاسپاره جماعهلری اعضالری اۉز مملکتلریدهگی تخمیناً ۱.۱میلیارد قرینداشینی مالي جهتدن قۉللب-قوّتلهماقده. اولر یوبارهیاتگن مبلغلر میلیاردلب دالرگه یېتهدی.
بیرلشگن ملتلر تشکیلاتی خلقارا قیشلاق خۉجهلیگینی رواجلنتیریش جمغرمهسینینگ مهاجرلر پول اۉتکزمهلرینی مالیهلشتیریش بۉییچه میکانیزمی مدیری پدرو دِ واسکونسلوسنینگ ایتیشیچه، بو میلیاردلب دالرنینگ آرتیده عادتده ۳۰۰–۴۰۰ دالرلیک پول اۉتکزمهلری تورهدی و مهاجرلر بوندهی مبلغلرنی ییلیگه ۹ یاکه ۱۰ مرته یوبارهدیلر.
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی حساباتیگه کۉره، مهاجرلرنینگ ۲۰۲۵-ییلده اۉز مملکتلریگه یوبارگن جمعی مبلغی دنیادهگی برچه رسمي رواجلنیش یاردمینینگ عمومي حجمیدن تۉرت برابردن کۉپراق بۉلگن. شونینگدېک، بو مبلغ کم و اۉرته درآمدلی مملکتلرگه کیریتیلگن تۉغریدن-تۉغری خارجي سرمایهلر حجمیدن هم آشگن.
بیراق گزارشده مهاجرلر پول اۉتکزمهلرینینگ اهمیتی آرتیب بارهیاتگنی عایلهلر و اقتصادیاتلرنی مهاجرلر خارجده دوچ کېلهدیگن اۉزگریشلرگه نسبتاً ینه-ده ضعیف قیلیب قۉیهیاتگنی قید اېتیلگن.
گزارشگه کۉره، بو حالت، اینیقسه، لاتین امریکاسی و کریب حوزهسی حدودلریده یقّال کۉزگه تشلنهدی. بو حدودلرده امریکا همان پول اۉتکزمهلرینینگ اېنگ ییریک منبعی بۉلیب قالماقده.
گزارشده مهاجرلرنی دېپورت قیلیش، مهاجرلر یشهیاتگن مملکتلرده ایش بیلن تأمینلشگه قۉییلهدیگن چېکلاولر یاکه ایشچی کوچیگه بۉلگن طلب نینگ کمهییشی پول یوبارهیاتگنلر سانینی قیسقرتیریشی و اولرنینگ پول یوباریش امکانیتینی چېکلشی ممکنلیگی حقیده آگاهلنتیریلگن.
شونگه قرهمهی، دِ واسکونسلوسنینگ ایتیشیچه، امریکا و اروپادهگی مهاجرت سیاستینینگ کوچهیتیریلیشی حاضرچه مهاجرتلرنینگ پول اۉتکزمهلریگه کېنگ کۉلمده تأثیر کۉرسهتمهگن.
اونینگ قۉشیمچه قیلیشیچه، عایلهلرنینگ احتیاجلری سببلی پول اۉتکزمهلری آقیمی حتا انقراض دوریده هم برقرار بۉلیب قالهدی.
مملکتلر اقتصادیگه مهم مالی کمک
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی مرکزي امریکا مهاجرت سیاستینینگ کوچهییشیدن اېنگ کۉپ ضرر کۉریشی ممکن بۉلگن حدودلردن بیری اېکنینی معلوم قیلدی.
اوشبو تشکیلات حساباتیگه کۉره، ۲۰۱۵-ییلده مهاجرلر پول اۉتکزمهلری گاندوراس یلپی ایچکی محصولاتی نینگ ۳۰ فایزینی، سَلوهدار یلپی ایچکی محصولاتی نینگ ۲۸ فایزینی و نیکراگوا یلپی ایچکی محصولاتی نینگ ۲۷ فایزینی تشکیل قیلگن.
تشکیلات، شونینگدېک، بیر تدقیقاتگه تهیهنیب، گواتېمهلهگه قَیتگن مهاجرتلرنینگ ۶۱ فایزی اۉز عایلهسینینگ اساسي باقووچیسی بۉلگنینی معلوم قیلگن. بو مهاجرلرنینگ مجبوري قَیتریلیشی مملکتده قالگن عایله اعضالری اوچون درآمدنینگ بیردنیگه یۉقالیشیگه آلیب کېلیشی ممکنلیگینی کۉرسهتهدی.
تشکیلات گزارشده لاتین امریکاسی و کریب حوزهسی دنیانینگ تورلی حدودلری آرهسیده مهاجرلر پول اۉتکزمهلرینینگ اېنگ تېز اۉسیشینی قید اېتگنی ایتیلگن. اوشبو پول اۉتکزمهلری ۱۳۲ فایزگه آشیب، ۱۶۸.۶ میلیارد دالرگه یېتگن.
گزارشگه کۉره، آسیا و تینچ اقیانوسی منطقهسی ۲۰۲۵-ییلده هم دنیادهگی مهاجرلر پول اۉتکزمهلرینی اېنگ کۉپ قبول قیلگن حدود بۉلیب قالگن. اوشبو منطقه جمعی ۳۸۴.۹ میلیارد دالر آلگن و بو دنیادهگی برچه پول اۉتکزمهلری نینگ ۵۳ فایزیگه تېنگ.
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی معلوماتیگه کۉره، افریقا ۲۰۲۵-ییلده ۱۲۴.۲میلیارد دالر آلگن. بو کۉرستکیچ اۉن ییل اوّلگیگه نسبتاً ۸۶ فایزگه آشگن. شو بیلن بیرگه، مصر ناجرههنی آرتده قالدیریب، افریقاده مهاجرلر پول اۉتکزمهلرینی اېنگ کۉپ قبول قیلهدیگن مملکتگه ایلنگن.
عایلهلر اوچون حیاتي مهم درآمد منبعی
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی مهاجرلر پول اۉتکزمهلری اولرنینگ عایلهلری اوچون حیاتي مهم درآمد منبعی اېکنینی تأکیدلهدی.
تشکیلات حساباتیگه کۉره، مهاجلر یوبارهدیگن پوللرنینگ قریب تۉرتدن اوچ قِسمی آزیق-طعام، باشپناه، سوو، برق و باشقه اساسي خدمتلر کبی زودلیکدهگی احتیاجلرگه صرفلنهدی.
تشکیلاتنینگ بیلدیریشیچه، قالگن چارک قِسمی، یعنی ییلیگه ۱۸۰میلیارد دالردن آرتیق مبلغ ساغلیقنی سقلش، تعلیم، اوی-جای، جمغرمه و تجارت باشلشگه صرفلنهدی.
گزارشگه کۉره، ۲۰۲۵-ییلده قریب ۲۳۳میلیارد دالر، یعنی یوباریلگن هر اوچ دالردن دېیرلی بیری قیشلاق اقتصادیاتلریگه یېتیب بارگن. بو حدودلرده عادتده ایش اۉرینلری، مالیوي خدمتلر و دولت آست قورمهسیدن فایدهلنیش امکانیتلری چېکلنگن بۉلهدی.
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی، شونینگدېک، پول اۉتکزمهلرینی آلووچی عایلهلر هر ییلی قیشلاق خۉجهلیگی و قیشلاق آزیق-طعام تیزیملریگه قریب ۲۲ میلیارد دالر سرمایه کیریتیشینی معلوم قیلدی.
تشکیلات اۉز حساباتیده پول اۉتکزمهلرینینگ عایلهلرگه اقلیم اۉزگریشی عاقبتلریگه قرشی کورهشیشده یاردم بېریشدهگی رۉلیگه هم اورغو بېرگن. بو یۉقاتلگن درآمدلرنی قاپلشدن تارتیب، طبيعي آفتلردن کېین اوی-جای و حیاتنی قَیته تیکلشگچه بۉلگن جریانلرنی اۉز ایچیگه آلهدی.
بیراق بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی مسووللریدن بیری دِ واسکونسلوس بو مبلغلر عایلهلر نینگ شخصي منبعلری اېکنینی و اولر «دولت نهادلری، اجتماعي حمایه، گومانیتار یاردم یاکه اقلیمنی مالیهلشتیریش اۉرنینی باسه آلمهسلیگی»نی تأکیدلهگن.
پول اۉتکزمهلرینی رقملشتیریشگه اعتبار
بیرلشگن ملتلر تشکیلاتی خلقارا قیشلاق خۉجهلیگینی رواجلنتیریش جمغرمهسی حاضرده پول اۉتکزمهلرینینگ یرمیدن کۉپی رقملی اصوللر آرقهلی یوباریلهیاتگنینی، بیراق اولرنینگ اکثریتی آخر-عاقبت آلووچیگه نقد پول شکلیده یېتکزیلهیاتگنینی معلوم قیلدی.
گزارشگه کۉره، ۲۰۲۵-ییلده اۉرگنیلگن پول اۉتکزمهلری خدمتلری نینگ اتیگی ۳۵ فایزی باشیدن آخریگچه تۉلیق رقملی بۉلگن.
بیرلشگن ملتلر تشکیلاتینینگ اوشبو اختصاصلشگن تشکیلاتی حساباتیده رقملی پول اۉتکزمهلری ارزانراق اېکنی قید اېتیلگن. اولر نینگ اۉرتهچه خرجتی ۴.۶فایزنی تشکیل اېتهدی، رقملی بۉلمهگن خدمتلرده اېسه بو کۉرستکیچ قریب ۷.۳ فایزگه تېنگ.
دِ واسکونسلوس: «تکنالوژيلر حقیقتاً هم یاردم بېریشی ممکن. اما بونینگ اۉزی یېترلی اېمس»، – دېگن.
اونینگ تأکیدلشیچه، عایلهلرگه تکنالوژيدن تشقری، پوللرنی آلیش و اولردن فایدهلنیش اوچون ایشانچلی همده همیان باپ اصوللر هم کېرهک.
بیرلشگن ملتلر تشکیلاتی خلق ارا قیشلاق خۉجهلیگینی رواجلنتیریش جمغرمهسی پول اۉتکزمهلری خرجتلرینی کمهیتیریش و شفّافلیگینی آشیریش، مالی خدمتلردن فایدهلنیش امکانیتلرینی یخشیلش همده عایلهلرگه جمعغریش، سوغورته اوچون کۉپراق امکانیت یرهتیشگه چقیردی.
