بیرلشگن ملتلر تشکیلاتینینگ باش کاتبی آنتونیو گوترش اۉزینینگ افغانستاندهگی وضعیت حقیدهگی ینگی گزارشیده جاري ییلنینگ ۱-مییدن ۳۱-جولاییگچه طالبلرگه قرشی قوراللی جبههلر افغانستان نینگ ۲۱ ولایتیده ۸۸ ته هجوم اوچون جوابگرلیکنی اۉز ذمّهسیگه آلگنینی ایتدی.
گزارشگه کۉره، بیرلشگن ملتلر تشکیلاتی ۵۵ ته هجومنی، جملهدن، جولای آییده صادر اېتیلگن ۳۰ ته هجومنی قید اېتگن.
بیرلشگن ملتلر تشکیلاتی باش کاتبینینگ ایتیشیچه، بو هجوملر اساسن طالبلرنینگ حربي تاسیساتلری و نظارت-اۉتکزیش پونکتلریگه، شونینگدېک، گروهنینگ «امر به معروف و نهی از منکر» خادملریگه قرشی هجوملرنی اۉز ایچیگه آلگن.
گزارشده «افغانستان آزادلیک جبههسی»، «افغانستان ملي مقاومت جبههسی»، «افغانستان بیرلشگن جبههسی»، «افغانستان جمهوریتچیلر جبههسی»، «سپاهیان میهن جبههسی»، «افغانستان مستقللیک جبههسی»، «یشیل قِسم»، «افغانستان آزادلیک حرکتی»، «اندراب قرشیلیک جبههسی»، «آزادلیک و عدالت حرکتی»، «افغانستان ملي گارد جبههسی» و «افغانستان ملي بسیج جبههسی» ناملری تیلگه آلینگن.
شو بیلن بیرگه، بیرلشگن ملتلر تشکیلاتی باش کاتبی گزارش دوریده طالبلرگه قرشی قوراللی مخالفلرنینگ فعالیتی «ینه-ده مرکزلشمهگن»، «ترقاقراق» بۉلیب، کۉپراق محلي نشانلرگه قرهتیلگنینی ایتگن.
گزارشده «سپاهیان میهن جبههسی» نینگ بدخشان ولایتی نینگ قویی یفتل تومنیگه هجومی و اونی وقتینچه اېگهلهگنی، شونینگدېک، «افغانستان آزادلیک جبههسی» نینگ بدخشاننینگ زیباک اولسواللیگیگه هجومی هم تصدیقلنگن.
گزارشگه کۉره، طالبان بدخشاننینگ زیباک اولسواللیگیه قیلینگن هجومنی قَیترگن و حدود اوستیدن نظارتنی سهقلب قالگن. بیراق تۉقنهشوولر دوام اېتگنی حقیده خبرلر ترقهلگن.
قریب اوچ مینگته خوفسیزلیک حادثهسی قید اېتیلگن
بیرلشگن ملتلر تشکیلاتی باش کاتبی اۉز گزارشیده جاري ییل نینگ ۱-مییدن ۳۰-جولاییگچه افغانستانده خوفسیزلیک و آسایشتهلیک بیلن باغلیق جمعی ۲ مینگ ۹۴۷ته حادثه قید اېتیلگنینی بیلدیرگن.
حساباتگه کۉره، بو کۉرستکیچ اۉتگن ییلنینگ شو دوریگه نسبتاً ۱۱فایزگه آشگن.
حساباتده ایتیلیشیچه، بو حادثهلر طالبلرگه قرشی قوراللی جبههسیلرنینگ هجوملریدن تشقری، پاکستان بیلن چېگرهدهگی تۉقنهشوولر و هجوملر، «اسلامي دولت-خراسان» ترماغی هجوملری همده بیرلشگن ملتلر تشکیلاتی خادملرینینگ خوفسیزلیگی و آسایشتهلیگی بیلن باغلیق حادثهلرنی هم اۉز ایچیگه آلهدی.
گزارشده قید اېتیلیشیچه، ۱-ميدهن ۳۱-جولایگچه افغانستان-پاکستان چېگرهسی درون کوزهتوولری، هوا هجوملری و پاکستان طالبانی (تیتیپی)، حافظ گُل بهادیر گروهی همده باشقه گروهلرنینگ افغانستانده موجودلیگی حقیدهگی دعوالر بیلن باغلیق جواب حربي حرکتلری سببلی بېقرار و ناتینچ بۉلیب قالگن.
گزارشگه کۉره، پاکستان ۱۰ و ۱۳-می کونلری غزنی شهریدهگی نشانلرگه هوا هجوملری اویوشتیرگن. ۱۰-جون کونی کنر ولایتی نینگ شیلتان اولسواللیگی، خوست ولایتینینگ سپیره تومنی و پکتیکا ولایتینینگ برمل تومنلرینی نشانگه آلگن. شونینگدېک، ۲۸جون کونی کنر ولایتی نینگ مروره اولسواللیگیگه، ۲۸-جون کونی اېسه پکتیا ولایتینینگ سمکنی و پکتیکا ولایتینینگ گيان اولسوالیکلریگه هجوم قیلگن.
بیرلشگن ملتلر تشکیلاتینینگ باش کاتبی، شونینگدېک، ۳۰-جولای کونی طالبان مدافعه وزیرلیگی پاکستان هجوملریگه جوابن پاکستان نینگ خیبر-پختونخوا و بلوچستان ولایتلریده «خراساندهگی داعش و طالبلرگه قرشی افغان گروهلریگه تېگیشلی اېکنی ایتیلگن جایلرگه درون هجوملری اویوشتیریلگنینی» معلوم قیلگنینی ایتگن.
بیرلشگن ملتلر تشکیلاتی باش کاتبینینگ گزارشیگه کۉره، «بو هجوملر مادّي ضرر همده بیر نېچه کیشینینگ هلاک بۉلیشی و یرهلنیشیگه سبب بۉلگن».
گزارشده پاکستانلیک رسميلر درونلرنینگ مملکت حدودیگه کیرگنینی تصدیقلهگنی و اوشبو درونلر موفقیتلی توتیب قالینگنینی بیلدیرگنی قید اېتیلگن.
بیرلشگن ملتلر تشکیلاتی باش کاتبینینگ حساباتیگه کۉره، اوشبو اوچ آی دوامیده پکتیا، پکتیکا، خوست، کنر و نورستان ولایتلری نینگ چېگره حدودلریده طالبلر و پاکستان کوچلری اۉرتهسیده وقتی-وقتی بیلن اۉق آتیشمهلر دوام اېتگن. بو تۉقنهشوولر تینچ اهالی آرهسیده قربانلر بۉلیشی و آستقورمهلرگه ضرر یېتیشیگه سبب بۉلگن.
بیرلشگن ملتلر تشکیلاتی باش کاتبی، شونینگدېک، «اسلامي دولت-خراسان» ترماغی ۳۰-جون کونی نورستان ولایتی نینگ وایگل تومنیدهگی طالبلر نظارت-اۉتکزیش پونکتیگه قیلینگن هجوم اوچون جوابگرلیکنی اۉز ذمّهسیگه آلگنینی ایتگن. هجومده طالبلرنینگ بیر نېچه خوفسیزلیک خادیمی یرهلنگن.
اونینگ قۉشیمچه قیلیشیچه، «اسلامي دولت-خراسان» ۲۹-جولای کونی بدخشان ولایتی مرکزی فیض آباد شهری یقینیده طالببز عملدارینینگ اۉلدیریلیشی اوچون هم جوابگرلیکنی اۉز ذمّهسیگه آلگن.
طالبان افغانستانده داعش موجودلیگینی انکار اېتهدی و بو گروه افغانستانده باستیریلگنینی، حاضر اېسه پاکستانده باشپناه و موجودلیککه اېگه اېکنینی ایتهدی.
بیرلشگن ملتلر تشکیلاتی باش کاتبی، شونینگدېک، حسابات دوریده بیرلشگن ملتلر تشکیلاتی خادملریگه بېواسطه تأثیر کۉرسهتگن خوفسیزلیک و آسایشتهلیک بیلن باغلیق ۶۴ته حادثه قید اېتیلگنینی بیلدیرگن.
اونینگ ایتیشیچه، بو کۉرستکیچ اۉتگن ییلنینگ شو دوریدهگی ۶۲ ته حالتگه نسبتاً آشگن، بیراق اوّلگی اوچ آیلیک دورده قید اېتیلگن ۹۲ ته حالتگه نسبتاً کمهیگن.
طالبلر افغانستان اوستیدن قَیته نظارت اۉرنهتگنیدن سۉنگ مملکت بۉیلب خوفسیزلیکنی تأمینلهگنینی و مملکتده هېچ قندهی قوراللی گروه موجود اېمسلیگینی دعوا قیلیب کېلهدی.
بیراق بیرلشگن ملتلر تشکیلاتی گزارشلریده افغانستانده بو گروهگه قرشی جبههلر و «اسلامي دولت-خراسان»نینگ هجوملری، شونینگدېک، «پاکستان طالبانی» کبی ترورچی گروهلر نینگ موجودلیگی قید اېتیلگن.
