طالبلر عالي تعلیم وزیرلیگی خصوصي خاتمالنبیین بیلیم یورتینینگ فعالیت یوریتیش جوازینی بېکار قیلدی. بیلیم یورتینینگ کابلدهگی بناسی و غزنیدهگی نمایندهلیگی اېشیکلری یاپیلدی.
طالبلر عالي تحصیلات وزیرلیگی مطبوعات کاتبی ضیا الله هاشیمي بوگون (چهارشنبه، ۲۵-سنبله) یوبارگن خبریده بیلیم یورتی جوازینی بېکار قیلینیشیگه «وزیرلیک سیاستلریگه رعایه قیلمسلیک، اسلامي قدریتلرگه حقارت و بیلیم یورتینینگ آبروسی همده مقامیدن ناتۉغری فایدهلنیش» سبب بۉلگنینی ایتدی.
اونینگ ایتیشیچه، طالبلر عالي تعلیم وزیرلیگی رهبریتی کېنگشی خاتمالنبیین بیلیم یورتینینگ جوازینی بېکار قیلیشگه قرار قیلگن. شو بیلن بیرگه، بیلیم یورتنینگ کابلدهگی بناسی و غزنیدهگی نمایندهلیگی اېشیکلری یاپیلگنی خبر قیلینگن.
طالبلر نمایندهسینینگ ایتیشیچه، خاتمالنبیین بیلیم یورتیده تحصیل آلهیاتگن محصللر باشقه خصوصي بیلیم یورتلرگه یۉنهلتیریلهدی.
خاتمالنبیین بیلیم یورتی افغانستاننینگ نفوذلی خصوصي بیلیم یورتلریدن بیری حسابلنگن.
اوّلراق منبعلر «اطلاعات روز» گزیتهسیگه طالبلر عالي تحصیلات وزیرلیگی اوشبو بیلیم یورتگه ینگی باشلیغی و اورین باسلری تعیینلب، اونی اۉز نظارتیگه آلگنینی ایتگن اېدی.
منبعگه کۉره، طالبلر قندهاردهگی گروه باشلیغی آفیسیگه یوبارگن مکتوبیده خاتمالنبیین بیلیم یورتی شیعه مؤسسهسی اېکنی و اونده سنّی مذهبیگه منسوب خادملر یۉقلیگینی بیلدیرگن.
«تمدن» تلویزیونی رهبری جواد محسنی و افغانستان سابق پارلمانی اعضاسی عبدالقیوم سجادي اوشبو بیلیم یورتنینگ اېگهلری حسابلنهدی.
طالبلر بوندن بیر مدت اوّل «تمدن» تلویزیونی و خاتمالنبیین مکتبینی هم مصادره قیلگن اېدی. طالبلر عدلیه وزیرلیگی اوشبو مېدیا تشکیلاتی و دیني مکتب جایلشگن یېر ناقانوني روشده اېگهللب آلینگنینی معلوم قیلگن.
