طالبلرنینگ بلخ و هلمند ولایتلریدهگی محلي رسميلری اوشبو ولایتلرده علیحده یوز بېرگن ایکّی ترافیک حادثهسی عاقبتیده تۉرت کیشی هلاک بۉلگنی و ینه تۉقّیز کیشی جراحتلنگنینی معلوم قیلدی.
طالبلرنینگ بلخ ولایتی امنیه قوماندانلیگینینگ معلوم قیلیشیچه، بوگون (چهارشنبه، ۲۵-سنبله) مزار شریف شهرینینگ ۱۲-حدودیده «سراچه» روسوملی موتر اغدریلیب کېتیشی عاقبتیده ایکّی کیشی هلاک بۉلگن، ینه ایکّی کیشی جراحتلنگن.
طالبلرنینگ بلخ ولایتی امنیه قوماندانلیگی مطبوعات سوزلاوچیسی محمدعیسی وثیق جراحتلنگنلر دوالنیش اوچون مزار شریف شهریدهگی ولایت شفاخانهسیگه آلیب کېتیلگنینی ایتگن.
او حادثه سببینی معلوم قیلمهگن.
شو بیلن بیرگه، هلمنددهگی طالبلر محلي رسميلری بوگون اوشبو ولایتده ایکّی کیچیک یېنگیل موتر تۉقنهشووی عاقبتیده ایکّی کیشی هلاک بۉلگنی و ینه یېتّی کیشی جراحتلنگنینی ایتگن.
طالبلرنینگ یۉل حرکتی رسميلری حادثه مارجه و ناد علی اولسواللیکلری اۉرتهسیدهگی یۉلده صادر بۉلگنینی، جراحتلنگنلرنینگ اَیریملری احوالی آغیر اېکنینی بیلدیرگن.
اوشبو حادثهنینگ سببی هم حاضرچه انیقلنمهگن.
افغانستانده ترافیک حادثهلری هر ییلی یوزلب کیشینینگ حیاتیگه ضامن بۉلهدی و یوزلب آدم جراحتلنهدی.
یۉللرنینگ یامان حالتده اېکنی، یۉل حرکتی بېلگیلرینینگ یۉقلیگی و هیداوچیلرنینگ احتیاطسیزلیگی اوشبو حادثهلرنینگ اساسي سببلری صفتیده کۉرسهتیلماقده.
