افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق طالبلرنینگ افغانستاندهگی هزارهلر و شیعهلرگه نسبتاً باسیمینی کوچهیتیرهیاتگنیدن چوقور خواطرده اېکنینی ایتدی.
فایق جنابلری بوگون کېچقورون بیرلشگن ملتلر تشکیلاتی خوفسیزلیک کېنگشی ییغیلیشیده سۉزلر اېکن، طالبلر تامانیدن هزاره و شیعهلرنینگ دیني همده اجتماعي بویوکلری حبسگه آلینهیاتگنیدن علیحده خواطر بیلدیردی.
او، شونینگدېک، طالبلرنینگ شیعهلرنینگ دیني مراسملریگه ارهلشهیاتگنی، اولرگه نسبتاً کمسیتیش سیاستینی آلیب بارهیاتگنی، شونینگدېک، اولرنینگ یېر و ملکلرینی تارتیب آلهیاتگنی حقیده خبرلر ترقهلگنینی ایتدی.
طالبلر سۉنگگی کونلرده افغانستاندهگی شیعهلرگه تېگیشلی اېنگ ییریک دیني مدرسه خاتم النبیین مکتبینی بۉشهتیب، مصادره قیلگن، «راه فردا» و «تمدن» تلویزیونلری ادارهلرینی یاپگن، خاتمالنبیین بیلیم یورتینینگ فعالیت اجازهسی بېکار قیلگن و بیر نېچه نفوذلی شیعه همده هزارهلرنی حبسگه آلگن.
بیر قطار نفوذلی شیعه بویوکلری طالبلر عدلیه وزیری نینگ بویروغی بیلن حبسگه آلینگن و اونینگ شخصي قماقخانهسیدن آزاد قیلینگن. بیراق «افغانستان شیعهلری عالي کېنگشی» نینگ اَیریم اعضالری همان طالبلر وزیرینینگ شخصي قماقخانهسیده سقلنماقده.
نصیر احمد فایق بوگونگی نطقیده افغانستاندهگی انسان حقوقلرینینگ عمومي حالتی هم چوقور خواطرلی اېکنینی ایتدی. اونینگ سۉزلریگه کۉره، یوناما حساباتیگه اساسن، فقط می آییدن جولایگچه بۉلگن دورده سابق حکومت عملدارلری و سابق خوفسیزلیک کوچلری خادملریگه قرشی ۱۲ ته قاتللیک، ۱۳ ته اۉزباشیمچهلیک بیلن حبسگه آلیش و قماققه سالیش همده قییناققه سالیش یاکه یامان معامله قیلیش نینگ اوچته حالتی حجتلشتیریلگن.
اونینگ ایتیشیچه: «عمومي عفو اعلان قیلینگنیگه قرهمهی، ژورنالیستلر همان حبسگه آلینماقده. ییتکرمه فعالیتی توختهتیلماقده یاکه سانسور قیلینماقده. جسماني جزالر اجرا اېتیلماقده و مدنی میدانی همان کېسکین چېکلنگن.»
فایق، شونینگدېک، سۉنگگی کونلرده مقصدلی قاتللیکلر و قصاص چارهلری نینگ دوام اېتهیاتگنینی ایتیب، کابلده سابق محکمهنینگ آتیب اۉلدیریلگنی حقیده خبر بېریلگنینی بیلدیردی.
اونینگ سۉزلریگه کۉره، تخار ولایتیده سابق خوفسیزلیک کوچلرینینگ ایکّی خادیمی قییناققه سالینیب، باشی کېسیلگنی حقیده هم خبرلر ترقهلگن. شونینگدېک، کابل، ارزگان و هرات ولایتلریده قاتللیک حالتلری قید اېتیلگنی حقیده خبر بېریلگن.
افغانستاننینگ بمتدهگی نمایندهلیگی سرپرستی اوشبو حالتلرنینگ هر بیری ایشانچلی و مستقل تېرگاونی طلب قیلیشینی ایتدی.
اونینگ تأکیدلشیچه، خلق هلاک بۉلهیاتگن، حبسگه آلینهیاتگن، قییناققه سالینهیاتگن یاکه بېدرَک یۉقالهیاتگن، بونینگ اوچون اېسه هېچ کیم جوابگرلیککه تارتیلمهیاتگن بیر پیتده، طالبلر افغانستانده خوفسیزلیکنی تأمینلهگنینی دعوا قیله آلمهیدی.
افغانستاننینگ بیرلشگن ملتلر تشکیلاتیدهگی نمایندهلیگی سرپرستی نطقینینگ باشقه بیر قِسمیده بېش ییللیک تجربه خلق ارا همجمعیتنینگ افغانستانگه نسبتاً سیاستینی خالصانه بهالشنی طلب قیلیشینی ایتدی.
او شوندهی دېدی: «یکّهلنیشنینگ اۉزی اۉزگریشگه آلیب کېلمهدی. انیق سیاسي مقصدلرسیز ملاقات هم بوندهی نتیجهگه آلیب کېلمهدی. یکّهلنیش و مناسبتلرنی نارمهللشتیریش اۉرتهسیدهگی بو ساخته تنلاوگه برهم بېریش کېرهک.»
فایق انیق سیاسي مقصدگه اېگه بۉلگن، تمایللرگه اساسلنگن، موافقلشتیریلگن و نتیجهگه یۉنهلتیریلگن ملاقات ضرورلیگینی تأکیدلب، «افغانستان بۉییچه مستقل بهالش» توصیهلرینی عملگه آشیریش همده بیرلشگن ملتلر تشکیلاتینینگ افغانستان بۉییچه مخصوص وکیلینی تعیینلشگه چقیردی.
او، شونینگدېک، «افغانلرگه اساسلنگن و افغانلرنینگ اۉزیگه تېگیشلی بۉلگن سیاسي جریان»نی تأکیدلب، «افغانلر اۉز مملکتینینگ کېلهجگی حقیده قرار قبول قیلیشده تماشابین اېمس، بلکه اشتراکچی بۉلیشی کېرهک»، دېدی.
