طالبلر نظارتیدهگی مخابرات و تکنالوژی وزیرلیگی «افغانستان انترنت المشینووی مرکزی»نی لایحهلشتیرگنی حقیده خبر بېریب، مرکزنی تشکیل اېتیشدن مقصد ایچکی انترنت ترافیکینینگ خوفسیزلیگینی تأمینلش اېکنینی بیلدیردی.
اوشبو وزیرلیک بوگون (پنجشنبه، ۲۶-سمبله) بیاناتیده مذکور لایحهنی عملگه آشیریش اوچون قریب ۱۰میلیون افغاني قیمتیدهگی اسکونهلر، تیزیملر، تخنیکي خدمتلر و باشقه جهازلر خرید قیلینیب، اۉرنهتیلگنینی معلوم قیلدی.
مخابرات وزیرلیگی اوشبو لایحه عملگه آشیریلیشی بیلن مملکتده انترنت ترافیکینی ایچکی المشیش اوچون مهم آستقورمه یرهتیلیشینی ایتدی. اونینگ مقصدی ایچکی انترنت ترافیکینی یخشیراق باشقریشنی آسانلشتیریش، علاقه صفتی و تېزلیگینی یخشیلش، اخبارات خوفسیزلیگینی کوچهیتیریش همده تشقی یۉنهلیشلر اینفرهتوزیلمسیگه قرملیکنی کمهیتیریشدن عبارت.
وزیرلیکنینگ معلوم قیلیشیچه، لایحهنینگ اساسي قِسملریگه Shared Hosting ، سېروېرلر، ذخیره نسخه آلیش تیزیملری، ویرتوالیزهتسيه، انترنت ترافیکینی تحلیل قیلیش تیزیملری، لاگلرنی باشقریش تیزیمی و باشقه اسکونهلر کیرهدی.
طالبلرنینگ علاقه وزیرلیگی قۉشیمچه قیلیشیچه، اوشبو لایحه ویب سایتلر، الکترون پُسته، شرید هاستینگ و باشقه رقملی خدمتلرنی مملکت ایچیده جایلشتیریش اوچون ضرور امکانیتلرنی یرهتگن. بو دولت ادارهلری، تعلیم مؤسسهلری و خصوصي سکتور احتیاجلرینی تأمینلشده مهم رۉل اۉینشی ممکن.
شونگه اۉخشش تیزیم ایران حکومتی تامانیدن هم یرهتیلگن بۉلیب، او «ملي انترنت» دېب اتلهدی. بو مملکت ایچیدهگی ترماق بۉلیب، فایدهلنووچیلرگه مملکت ایچیدهگی ویب سایتلر و خدمتلرگه اولنیش امکانینی بېرهدی. سۉنگگی کمیده بیر ییل ایچیده ایران حکومتی اوروش و ناراضیلیکلر سبب اوچ مرته انترنتنی اوزیب، مملکت یشاووچیلرینینگ فایدهلنیشینی ایچکی ترماق بیلن چېکلهگن.
طالبلر «ایچکی انترنت المشینووی مرکزی»نی تشکیل اېتهیاتگنینی انترنتگه کیریشنی چېکلش یاکه اونی بوتونلهی اوزیب قۉییش خواطرلری موجود بۉلگن بیر پیتده اعلان قیلماقده.
اوشبو گروه اۉتگن ییلی نامعلوم سببگه کۉره برچه انترنت خدمتلرینی ایکّی کوندن آرتیق وقت دوامیده بوتونلهی اوزیب قۉیگن اېدی. بو عمومي اوزیلیشدن اوّل طالبان رهبری فایبری نوری انترنتنی اوزیش حقیده بویروق بېرگن اېدی.
طالبلر یقینده ماهوارهای استارلینک انترنتیدن فایدهلنیشنی هم تعقیقلهگنینی اعلان قیلدی.
سۉنگگی بېش ییل دوامیده طالبلرنینگ افغانستان فقرالرینینگ حقوق و اېرکینلیکلرینی قتّيق باستیریشی و اولرگه جدّي چېکلاولر اۉرنهتیشیگه قرهمهی، حاضرگچه مملکتده انترنتدن فایدهلنیش امکانیتی موجود. بیراق افغانستانده انترنت سېکین و قیمت.
انترنتنینگ فعال بۉلیشی طالبلرنینگ حرکتلرینی کوزهتیش امکانینی بېرگن و عینِ پیتده اوشبو گروهنینگ اَیریم چېکلاولریگه قرشی چیقیش امکانیتینی هم یرهتگن. طالبلر عیاللر و قیزلرنینگ تعلیم آلیشیگه تعقیق قۉیگن بۉلسه-ده، اَیریم عیاللر و قیزلر تعلیمنی انترنت آرقهلی دوام اېتتیریشگه حرکت قیلماقده.
