چین تشقی ایشلر وزیری وانگ یی اۉزینینگ ایرانلیک همکسبی عباس عراقچی بیلن اوچرهشگنیدن سۉنگ ایران و امریکانی عاقلانه حرکت قیلیشگه همده اسلام آباد شرطنامهسیگه قَیتیشگه چقیردی.
چین تشقی ایشلر وزیرلیگی بوگون (پنجشنبه، ۲۶-سمبله) بیانات بېریب، وانگ یی و عراقچی پکینده اوچرهشیب، مذاکره اۉتکزگنینی معلوم قیلدی.
چین و ایران تشقی ایشلر وزیرلری منطقوي مسألهلر، جملهدن، ایران و امریکا اۉرتهسیدهگی اوروش همده هرمز بۉغازی حقیده فکر المشگن.
وانگ یی ایران و امریکا اۉرتهسیدهگی نزاع نینگ دوام اېتیشی و چۉزیلیشی منفعتدار تامانلر همده خلق ارا همجعميت منفعتلریگه خدمت قیلمسلیگینی ایتگن.
او شوندهی دېگن: «چین ایران و امریکانی عاقلانه حرکت قیلیشگه، وزمینلیکنی سقلشگه و امکان قدَر تېزراق اسلام آباد کیلیشوویگه قَیتیشگه چقیرهدی.»
چین تشقی ایشلر وزیری ایکّی دولت اېریشیلگن کېلیشوولر اساسیده مذاکره میکانیزمینی قَیته تیکلشی و اۉزلرینی قیزیقتیرهیاتگن مسألهلر یوزهسیدن مضمونلی مصلحتلشوولر اۉتکزیشی کېرهکلیگینی قۉشیمچه قیلگن.
وانگ یی، شونینگدېک، برچه تامانلرنی هرمز بۉغازینی امکان قدَر تېزراق قَیته آچیش، خلقارا سوو یۉللری خوفسیزلیگی و آچیقلیگینی تأمینلش، انرژی تشووی همده ایشلب چیقریش و تأمینات زنجیرلری نینگ برقرارلیگینی کفالتلش اوچون ثمرهلی چارهلر کۉریشگه چقیرگن.
او منطقهدهگی کېسکینلیک نینگ یمن و قیزیل دېنگیزگه یاییلیشیدن آگاهلنتیریب، برچه تامانلر وضعیتنی ینه-ده مرکّبلشتیرهدیگن حرکتلردن تيیلیشی و مسألهلرنی ملاقات همده مذاکرهلر آرقهلی حل قیلیشی کېرهکلیگینی ایتگن.
شو بیلن بیرگه، ایران تشقی ایشلر وزیری عباس عراقچی ایکسدهگی صحیفهسیده وانگ یی بیلن توشگن صورتینی نشر قیلیب، چیندهگی همکارلری بیلن «موفقیتلی مذاکرهلر» اۉتکزگنینی ایتگن.
او وقت اۉتیشی بیلن شکللنگن چین بیلن استراتژیک شریکلیککه ایران کتّه اهمیت بېریشینی بیلدیرگن.
عراقچی قۉشیمچه قیلگن: «بوگونگی قرارلر منطقهدهگی کېلهجکدهگی استراتژیک موازنتنی بېلگیلهیدی و کېنگ کۉلملی همده اولکن عاقبتلرگه آلیب کېلهدی. جمهور رییس شی تامانیدن ایلگری سوریلگن تینچلیکنینگ تۉرت تمایلی مهم رۉل اۉینهیدی.»
جناب شی تامانیدن جاري ییل بهاریده ایلگری سوریلگن تۉرت مادّهلی رېجهده چین برچه دولتلرنی «تینچ-تاتوو یشش، بیر-بیرینینگ حاکمیت و حدودي یخلیتلیگینی حرمت قیلیش، خلقارا حقوققه رعایه اېتیش همده ترقیات و خوفسیزلیک اۉرتهسیدهگی موازنتنی تأمینلش»گه چقیرهدی.
