۲۴ دولت و اروپا اتفاقی قۉشمه بیاناتده طالبلردن عیاللرگه نسبتاً جندر کمسیتیشلری همده عیاللر و قیزلرنی منتظم روشده باستیریشنی توختهتیشنی طلب قیلدی.
فرانسه تامانیدن تیارلنگن اوشبو بیانات چهارشنبه کونی (۲۵ سمبله) بیرلشگن ملتلر تشکیلاتی خوفسیزلیک کېنگشینینگ افغانستان بۉییچه ییغیلیشی بیلن بیر وقتده تقدیم اېتیلدی.
۲۴ دولت و اروپا اتفاقی طالبلرنینگ عیاللرگه قرشی سیاستینی «جندر کمسیتیشی» و «عیاللر و قیزلرنی منتظم روشده باستیریش» دېب اتهب، قارهلهدی.
بو دولتلر افغانستان عیاللری و قیزلری بیلن «تۉلیق بیردملیک» بیلدیریشیب، شوندهی دېدی: «بیز طالبلر تامانیدن عملگه آشیریلهیاتگن جندر کمسیتیشی همده منتظم و دوامي باستیریشنی قطعي قارهلهیمیز.»
بیاناتنی امضالهگن دولتلر طالبلردن «جندر بۉییچه اجرهتیش سیاستیگه برهم بېریش»نی طلب قیلدی.
اولر طالبلر عیاللر و قیزلر حقوقلریگه نسبتاً جاري اېتگن برچه چېکلاولرنی بېکار قیلیشی و انسان حقوقلرینینگ هر قندهی بوزیلیشیگه برهم بېریشی کېرهکلیگینی تأکیدلهدی.
بو بیانات بیرلشگن ملتلر تشکیلاتی خوفسیزلیک کېنگشینینگ افغانستان مسألهسیگه بغیشلنگن ییغیلیشی اۉتکزیلگنیدن بیر کون اۉتیب اعلان قیلیندی.
ییغیلیشده انسان حقوقلری، خصوصاً، عیاللر حالتی، افغانستان حدودیدن کېلیب چیقهیاتگن ترورچیلیک تهدیدلری همده طالبلر تامانیدن تهدید و تضییققه اوچرهیاتگن جماعه صفتیده هزارهلر و شیعهلرنینگ احوالی محاکمه قیلینگن مهم مسألهلر قطاریده بۉلدی.
تورلی دولتلر وکیللری طالبلرنینگ عیاللرگه قرشی سیاستینی جندر کمسیتیشی دېب بهالب، بو جریانگه برهم بېریشگه چقیردی.
افغانستاننینگ سابق کانلر و پترولیم وزیری نرگس نهان طالبلر سیاستینی «جندر آپارتایدی» دېب اتهب، خلق ارا همجعميت اونی برطرف اېتیش اوچون عملي چارهلر کۉریشی کېرهکلیگینی ایتدی.
