آناتولی اخبارات خوفسیزلیک منبعلریگه تهیهنیب خبر بېریشیچه، تورکيه ملي استخبارات تشکیلاتی (MIT) باشلیغی ابراهیم کَلین افغانستانگه قیلگن سفریدن سۉنگ پاکستانگه بارگن.
تورکيه افغانستاندهگی طالبلر و پاکستان حکومتی اۉرتهسیده واسطهچیلیک قیلهیاتگن دولتلردن بیری حسابلنهدی.
آناتولی خبریگه کۉره، کَلین اسلام آبادگه تشریفی دوامیده اوردو قوماندانی عاصم منیر، حربي استخبارات تشکیلاتی عاصم ملک و پاکستان باش وزیری شهباز شریف بیلن اوچرهشگن.
اوچرهشوولرده تورکيه و پاکستان اۉرتهسیدهگی مناسبتلر نینگ حاضرگی حالتی و ایکّی دولت اۉرتهسیدهگی همکارلیکنی کېنگهیتیریش امکانیتلری، شونینگدېک، منطقوي و گلوبل واقعهلر محاکمه قیلینگن.
ایکّی دولت رسميلری امریکا و اسرایل نینگ ایرانگه قرشی اوروشی باشلنگنیدن کېین یقین شرقده یوزهگه کېلگن خوفسیزلیک وضعیتی، منطقهدهگی کېسکینلیک نینگ کوچهییشی همده اوشبو ماجرانینگ منطقه مملکتلریگه سیاسي، خوفسیزلیک و اقتصادي عاقبتلری حقیده مذاکره آلیب بارگن.
منبعلرگه کۉره، اولر ماجرانینگ باشقه مملکتلر و حدودلرگه ترقهلیش خوفینی هم کۉریب چیققن.
یمن و سعوديه عربستانی اۉرتهسیدهگی سۉنگگی کېسکینلیک و اۉزگریشلر همده بو واقعهلرنینگ منطقوي برقرارلیککه توغدیرهیاتگن خوفلری هم محاکمه قیلینگن موضوعلردن بۉلگن.
مذاکرهلرده تامانلرنینگ منطقهده برقرارلیکنی تیکلشگه قرهتیلگن سعی-حرکتلری دایرهسیده مککه قۉشمه مدافعه کېلیشووینینگ عمومي اساس صفتیدهگی اهمیتیگه اورغو بېریلگن.
ایکّی دولت رسميلری، شونینگدېک، کېسکینلیکنی کمهیتیریش و دیپلوماتیک کاناللرنی آچیق سقلشده تورکيه و پاکستاننینگ رۉلیگه اورغو بېرگن.
آناتولی نینگ یازیشیچه، تورکيه افغانستان و پاکستان اۉرتهسیدهگی کېسکینلیکنی ملاقات آرقهلی حل قیلیشگه یاردم بېریش بارهسیدهگی سعی-حرکتلرینی دوام اېتتیریشینی بیلدیرگن.
تورکيه و پاکستان رسميلری ایکّی دولت اۉرتهسیده خوفسیزلیک و استخبارات ساحهلریده موجود یوقاری درجهدهگی همکارلیکنی ینه-ده کوچهیتیریشگه کېلیشیب آلگن.
تورکيه ینه بیر بار تروریزمگه قرشی کورهشده پاکستاننی قۉللب-قوّتلشینی بیلدیرگن و پاکستاننینگ تروریزمگه قرشی کورهش صلاحیتینی مستحکملشگه قرهتیلگن سعی-حرکتلرنی قۉللب-قوّتلشده دوام اېتیشینی تأکیدلهگن.
کَلین نینگ پاکستانگه سفری اونینگ کابلده طالبلرنینگ یوقاری مرتبهلی رسميلری بیلن اوچرهشیب، مذاکرهلر آلیب بارگنیدن سۉنگ عملگه آشیریلگن.
عینِ پیتده پاکستان تشقی ایشلر وزیرلیگی مطبوعات سوزلاوچیسی سجاد حیدر خان اسلام آباد و کابل اۉرتهسیدهگی کېسکینلیکنی کمهیتیریش اوچون دولتلرنینگ واسطهچیلیک حرکتلری طالبلرنینگ ایستکسیزلیگی سببلی نتیجه بېرمهگنینی ایتگن.
او بوگون، پنجشنبه، ۲۶ سنبلهده بۉلیب اۉتگن مطبوعات انجمنیده تورکيه استخبارات باشلیغی و قطر ملي خوفسیزلیک کېنگشی رئیسی اۉرینباسری نینگ کابلگه تشریفی حقیدهگی سوالگه جوابن، بو تشریف نینگ کېلیب چیقیشی حقیده معلوماتگه اېگه اېمسلیگینی، بیراق قطر و تورکيه واسطهچیلیک بارهسیده جوده کانتروکتیف رۉل اۉینهگنینی ایتگن.
اونینگ قۉشیمچه قیلیشیچه، پاکستان اۉتگن ییلی واسطهچیلر آرقهلی طالبلر بیلن ایکّی مرته ملاقات اۉرنهتیشگه حرکت قیلگن، بیراق طالبلرنینگ مناسبتی سلبي بۉلگن.
