محلي منبعلر و طالبلرنینگ نورستان همده کنر ولایتلریدهگی مسووللری کوچلی یامغیر، دۉل یاغیشی و سېل کېلیشی عاقبتیده اوشبو ایکّی ولایتده اهالیگه تلفات و مادّي ضرر یېتگنینی اَیتماقده.
اوشبو ایکّی ولایتده تیناوون و بوگون (پنجشنبه، ۲۶ سنبله) کوچلی یامغیر یاغگن.
نورستاننینگ وایگل اولسواللیگی محلي منبعلرگه کۉره، بوگون توشدن کېین تومن نینگ تورلی حدودلریده کوچلی یامغیر و دۉل یاغگن. نتیجهده مېوهلی باغلر و قیشلاق خۉجهلیگی اېکینلریگه ضرر یېتگن.
حاضرچه یېتکزیلگن ضررنینگ مقداری معلوم قیلینمهگن.
طالبلرنینگ کنر ولایتی اخبارات و مدنیت ریاستیدهگی بیر منبع چهارشنبه کونی اسدآباد شهری همده چوکی، نرنگ، خاص کنر و چپهدره، اولسواللیکلریده یوز بېرگن سېل عاقبتیده ایکّی نفر یاش باله هلاک بۉلگنینی ایتگن.
منبعنینگ سۉزلریگه کۉره، بالهلردن بیرینینگ جسدی تاپیلگن، ایکّینچی بالهنینگ جسدینی قیدیریش ایشلری دوام اېتماقده.
منبعنینگ قۉشیمچه قیلیشیچه، اوشبو سېللر عاقبتیده ۳۲ باش چاروا نابود بۉلگن. شونینگدېک، ایکّی مسجد، یوزلب جیریب قیشلاق خۉجهلیگی یېرلری، سوغاریش کاناللری، ایکّی تېگیرمان و یۉللرگه ضرر یېتگن.
