یمن حوثيلری و سعوديه عربستانی اۉرتهسیدهگی کېسکینلیک و تۉقنهشوولر کوچهییب بارهیاتگن بیر پیتده، امریکا تشقی ایشلر وزیری سعوديه حکومتیگه لاکهید مارتین شرکتی تامانیدن ایشلب چیقریلهدیگن ایلغار «اف -۳۵» قیرووچی اوچاقلرینی ساتیشنی معقولهگنینی معلوم قیلدی.
رویترز خبریگه کۉره، امریکا تشقی ایشلر وزیری اوشبو کېلیشوونینگ تخمیني قیمتی ۲۴.۳میلیارد دالر اېکنینی بیلدیردی. کانگرس تامانیدن معقوللنگن تقدیرده، کېلیشوو ۴۸ ته اف-۳۵، ۴۹ قیرووچی اوچاقی، «پرت اند ویتنی» شرکتی ایشلب چیقرهدیگن علاقه واسطهلری، احتیاط قِسملر همده باشقه جهازلر و تخنیکي خدمتلرنی اۉز ایچیگه آلهدی.
سعوديه عربستانی ۲۰۲۵-ییلده اف-۳۵ قیرووچی اوچاقلرینی خرید قیلیش بۉییچه سۉراوینی بېواسطه امریکا جمهور رییسی دونالد ترامپگه تقدیم اېتگن اېدی.
سعوديه عربستانی نینگ واشنگتندهگی اېلچیخانهسی امریکا تشقی ایشلر وزیرلیگینینگ اوشبو قیرووچی اوچاقلرنی ساتیشنی معقولهگنینی آلقیشلب، بونی ایکّی دولت اۉرتهسیدهگی مدافعه ساحهسیدهگی همکارلیکنی ینهده مستحکملش یۉلیدهگی نوبتدهگی قدم دېب اتهدی.
اېلچیخانه ایکسدهگی بیاناتیده اوشبو قرار «سعوديه عربستانی و امریکا اۉرتهسیدهگی استراتژیک شریکلیک نینگ کوچی و برقرارلیگینی همده ایکّی دولت اۉرتهسیدهگی مدافعه همکارلیگینینگ ایزچیل رواجلنیشینی نمایش اېتهدی»، دېب یازدی.
رویترز خبریگه کۉره، کېلیشوو عملگه آشیریلسه، بو امریکا سیاستیده سېزیلرلی اۉزگریش بۉلیشی و یقین شرقدهگی حربي کوچلر موازنتیگه تأثیر کۉرسهتیشی ممکن.
رویترز شونینگدېک، اوشبو کېلیشوو واشنگتننینگ اسرایل نینگ «حربي جهتدن صفت اوستونلیگینی» سقلب قالیش سیاستینی قندهی بېلگیلشی اوچون هم سیناو بۉلیشینی قید اېتگن.
حاضرده اسرایل یقین شرقده «اف-۳۵» قیرووچی اوچاقلریگه اېگه بۉلگن یگانه دولت حسابلنهدی.
واشنگتن یقین شرق مملکتلریگه قورال ساتیش مسألهسینی کۉریب چیقیشده اسرایل نینگ «حربي جهتدن صفت اوستونلیگی» سقلنیشینی حسابگه آلهدی. بو عملده اسرایل منطقهدهگی عرب دولتلریگه نسبتاً امریکانینگ ایلغار قوراللریدن فایدهلنیش امکانیتیگه اېگه بۉلیشی کېرهکلیگینی انگلهتهدی. بیراق اوشبو کېلیشوو عملگه آشسه، بو سیاست اۉزگریشی ممکن.
شو بیلن بیرگه، امریکا کانگرسینینگ کۉریب چیقیشی و نظارتی اف-۳۵ اوچاقلرینینگ سعوديه عربستانیگه ساتیلیشیگه تۉسقینلیک قیلیشی ممکن.
امریکا قانونچیلری سعوديهلیک ژورنالیست جمال قاشیقچی نینگ ۲۰۱۸-ییلده اۉلدیریلگنیدن کېین رياض بیلن قورال-یراغ سوداسی بۉییچه خواطر بیلدیرگن اېدی. کانگرسنینگ اَیریم اعضالری هنوزگچه سعوديه عربستانی بیلن حربي همکارلیکنی کېنگهیتیریش مسألهسیده احتیاطکارانه موضع ده قالماقده.
