«افغانستاننی قوتقریش اوچون ملي مقاومت عالي کېنگشی» طالبلرنینگ خاتم النبیین بیلیم یورتی و اونینگ برچه شعبهلرینی، عالي تحصیلات وزیرلیگیدن رسمي فعالیت یوریتیش اجازهسیگه اېگه بۉلیشیگه قرهمهی، یاپیش حقیدهگی قراری «اۉزباشیمچهلیک بیلن قبول قیلینگن، هېچ قندهی حقوقي اساسگه اېگه بۉلمهگن همده علم-فن، تعلیم و اکادمیک مؤسسهلر مستقللیگیگه آچیقدن-آچیق دشمنلیک نمونهسیدیر»، دېب ایتدی.
اوشبو کېنگش بوگون، جمعه کونی، 27-سنبله کونی اعلان قیلگن بیاناتیده اوشبو قرار مینگلب محصللر، پروفیسور-اۉقیتووچیلر و اولرنینگ عایلهلریگه ضرر یېتکزگنینی همده طالبلر مملکتنینگ علمي رواجلنیشینی قۉللب-قوّتلش اۉرنیگه افغانستاننینگ تعلیم، تدقیقات و فکري آستقورمهلرینی یۉق قیلیش یۉلیدن بارهیاتگنینی کۉرسهتیشینی بیلدیردی.
«افغانستاننی قوتقریش اوچون ملي مقاومت عالي کېنگشی» شونینگدېک، «افغانستان بیلیم یورتلریدن حقوق و سیاسي مضمونلر یۉنهلیشلرینینگ آلیب تشلنیشی طالبلرنینگ عالي تحصیلات تیزیمینی ضعیفلشتیریش، گومانیتار فنلرنی یۉق قیلیش، تنقیدي فکرلشنی چېکلش همده یاش اولادنی حقوق، عدالت، دولت باشقرووی و سیاست ساحهلریده مخصوص تحصیل آلیش امکانیتیدن محروم اېتیشگه قرهتیلگن تیزیملی سیاستی نینگ دوامیدیر»، دېب ایتدی.
اوشبو کېنگشنینگ تأکیدلشیچه، مذکور سیاستنینگ عاقبتی قانون اوستوارلیگینینگ ضعیفلشیشی، مملکتنینگ علمي صلاحیتی پهسهییشی همده افغانستاننینگ حقوقي و سیاسي ساحهلردهگی ملَکهلی و مسوولیتلی متخصصلردن محروم بۉلیشیگه آلیب کېلهدی.
کېنگش، شونینگدېک اېرکین عامهوي اخبارات واسطهلریگه نسبتاً چېکلاولرنینگ کوچهیتیریلیشی، مستقل رسانهلرنینگ یاپیلیشی، ژورنالیستلرنینگ حبسگه آلینیشی، تهدید قیلینیشی و قۉرقیتیلیشی همده سانسورنینگ کېنگهییشینی کېسکین قارهلهدی. اونگه کۉره، سۉز و مطبوعات اېرکینلیگی خلقلرنینگ اېنگ اساسي حقوقلریدن بیریدیر. تنقیدچیلرنینگ آوازینی کوچ و تهدید آرقهلی اۉچیرهدیگن گروه خلق آلدیده اخلاقي و سیاسي مشروعیتگه اېگه اېمس.
«افغانستاننی قوتقریش اوچون ملي مقاومت عالي کېنگشی» بیاناتیده، شونینگدېک، «طالبلر کمسیتووچی و مونوپولیستیک سیاستی آرقهلی اېلتلر، مذهبلر و افغانستاننینگ برچه فقرالری حقوقلرینی کېنگ مقیاسده بوزماقده. اېلتلر، مذهبلر، رهبرلر و سیاسي کوچلرنی مملکت باشقرووی جریانیدن تیزیملی روشده چېتلهتیش آرقهلی ملي بیرلیک، اجتماعي همجهتلیک و جماعتچیلیک ایشانچینی جدّي خوف آستیده قالدیرماقده»، دېب یازگن.
اوشبو کېنگش بیرلشگن ملتلر تشکیلاتی، انسان حقوقلری کېنگشی، اسلام همکارلیک تشکیلاتی، منطقه و دنیا مملکتلری همده انسان حقوقلرینی حمایه قیلووچی برچه خلق ارا تشکیلاتلردن انسان حقوقلرینینگ منتظم بوزیلیشی، اساسي اېرکینلیکلر نینگ باستیریلیشی، تیزیملی کمسیتیش، علمي و مدنی نهادلرنینگ یۉق قیلینیشی همده طالبلرنینگ اوتاریتر سیاستی دوام اېتیشیگه قرشی سکوت سقلهمسلیکنی سۉرهدی.
کېنگش خلق ارا تشکیلاتلرنی برچه حقوقي، سیاسي و دیپلوماتیک میکانیزملردن فایدهلنیب، طالباننی جوابگرلیککه تارتیش و افغانستان خلقی نینگ اساسي حقوقلرینی حرمت قیلیشگه مجبور اېتیشگه چقیردی.
«افغانستاننی قوتقریش اوچون ملي مقاومت عالي کېنگشی» «افغانستان اونینگ برچه یشاوچیلریگه تېگیشلیدیر و هېچ بیر گروه زۉرآورلیک، استبداد، ماناپالیزم، کمسیتیش آرقهلی بوتون بیر خلق تقدیرینی گروگه آلیش حقوقیگه اېگه اېمس»، دېب تأکیدلهدی.
طالبلرنینگ عالي تعلیم وزیرلیگی ایکّی کون اوّل خاتم النبیین خصوصي بیلیم یورتینینگ فعالیت یوریتیش اجازهسینی بېکار قیلگن و شوندن سۉنگ بیلیم یورتنینگ کابلدهگی بناسی همده غزنی شهریدهگی نمایندهلیگی اېشیکلری یاپیلگن.
طالبلر عالي تحصیلات وزیرلیگی مطبوعات سوزلاوچیسی ضیا الله هاشیمي بیلیم یورت جوازی نینگ بېکار قیلینیشیگه سبب صفتیده «وزیرلیک سیاستلریگه رعایه قیلمسلیک، اسلامي قدریتلرگه حقارت و بیلیم یورت نینگ آبروسی همده موقعیدن ناتۉغری فایدهلنیش»نی کۉرسهتگن.
طالبلر بوندن اوّل خاتم النبیین علمی حوزهسی و تمدن تلویزیونینی هم یاپگن اېدی. اوشبو اوچ تعلیم، دیني و مدني مجموعه شیعه علمالریدن آیتالله شیخ محمد آصف محسنی تامانیدن تشکیل اېتیلگن بۉلیب، او وفات اېتگنیدن کېین اونینگ عایله اعضالری تامانیدن باشقریلگن.
طالبلر سۉنگگی کونلرده «راه فردا» خصوصي تلویزیونینینگ فعالیتینی هم توختتگن و اونینگ امتیاز اېگهسینی حبسگه آلگن. اوشبو گروه، شونینگدېک، بیر قطار شیعه و هزاره جماعهسی نفوذلی وکیللرینی، جملهدن، «افغانستان شیعهلری عالي کمیسیونی» باشلیغی و اعضالرینی حبسگه آلیب، قماققه تشلهگن.
