آلمان پولیسی مملکت غربیدهگی «ووپرتال» شهریده یهوديلر کنیسهگه اۉت قۉییشگه اورینگنلیکده گمان قیلینهیاتگن ۳۷ یاشلی افغانستانلیک اېرککنی حبسگه آلدی.
دویچه وله خبریگه کۉره، بو اېرکک تیناوون توشدن کېین (پنجشنبه، ۲۶-سنبله) محلي وقت بیلن دستلب یهوديلر کنسیهسینینگ یان اېشیگیگه یانووچن مادّه سېپگن و کېین اونی یاققن.
اوشبو نشر خبریگه کۉره، پولیس یانغین کنسیهگه تشریف بویورووچیلر تامانیدن تېزده اۉچیریلگنینی و یېتکزیلگن ضرر آز مقدارده اېکنینی معلوم قیلگن.
آلمان پولیسی دستلبکی تېرگاو نتیجهلریگه کۉره، افغانستان وطنداشی بو ایشنی یالغیز عملگه آشیرگنینی بیلدیرگن.
آلمان یهوديلر کېنگشی اوشبو هجومدن خواطر بیلدیرگن و اونی آلمانده یهوديلرگه نسبتاً نفرت نینگ تاباره عادتي حالگه ایلنیب بارهیاتگنینینگ بېلگیسی دېب بهالهگن.
اوّل هم افغانستانلیکلر آلمانده صادر اېتیلگن بیر قطار جنایي حادثهلرگه علاقهدارلیکده گمان قیلینگن.
اوشبو هجوملردن سۉنگ آلمان حکومتی «جنایتچی مهاجرلر»نی افغانستانگه دېپورت قیلیشنی قَیته باشلهدی و بو بارهده طالبلر بیلن کېلیشووگه اېریشدی.
آلمان حاضرگچه یوزلب «جنایتچی مهاجرلر»نی افغانستانگه دېپورت قیلگن و اولرنی چیقریب یوباریش جریانینی تېزلشتیریشگه حرکت قیلماقده.
