بیرلشگن ملتلر تشکیلاتی متخصصلرینینگ ایتیشیچه، پاکستان حکومتی افغانستان وطنداشلرینی دېپورت قیلیش حقیده قرار قبول قیلیشدن آلدین، دېپورت قیلینگن تقدیرده تعقیب، قییناقلر و انسان حقوقلرینینگ باشقه جدّي بوزیلیشلریگه دوچ کېلیشی ممکن بۉلگن شخصلرنی انیقلش اوچون زودلیک بیلن چارهلر کۉریشی کېرهک.
بیرلشگن ملتلر تشکیلاتی متخصصلری بوگون (جمعه، ۲۷-سنبله) بیر بیانات نشر قیلیب، افغانستان وطنداشلرینینگ پاکستاندن مجبورن دېپورت قیلینهیاتگنیدن چوقور خواطرده اېکنینی بیلدیرگن.
بیرلشگن ملتلر تشکیلاتی متخصصلری شوندهی دېگن: «شاشیلینچ اوستوار وظیفه خوف آستیدهگی افغانلر قۉرقمسدن مراجعت قیلیشی، هر بیر حالت علیحده بهالنیشی و اوشبو بهالش یکونلنگونگه قدَر دېپورتهدن حمایهلنیشی ممکن بۉلگن شفّاف و آچیق جریاننی یرهتیشدن عبارت بۉلیشی کېرهک.»
بیرلشگن ملتلر تشکیلاتی مخصصلرینینگ ایتیشیچه، بوندهی جریانلر بۉلمهسه، ضعیف قتلمگه منسوب شخصلر یشیرینیب یوریشگه مجبور بۉلیشی ممکن، چونکه اولر حبسگه آلینیشی، قملیشی یاکه دېپورت قیلینیشیدن قۉرقیب، یاردم سۉرهی آلمهیدی.
اوّلراق پاکستان تشقی ایشلر وزیرلیگی مملکت قریب ۱۶ مینگ نفر حمایهگه محتاج افغانستان وطنداشینی انیقلهگنی و بو حقده حقوقنی محافظه قیلووچی اۉرگانلرگه هم معلومات بېریش چارهلرینی کۉرگنینی معلوم قیلگن.
بیرلشگن ملتلر تشکیلاتی متخصصلری اوشبو معلوماتنی آلقیشلهگن حالده، مذکور شخصلرنی انیقلشده قۉللنیلهیاتگن میزانلر و جریانلر حقیده کۉپراق شفّافلیک بۉلیشینی طلب قیلگن.
اولر بوندهی میکانیزملر تعقیب، قییناقلر یاکه اۉرنینی قاپلب بۉلمهیدیگن ضررگه دوچ کېلیشی ممکن بۉلگن افغانستان وطنداشلریگه حبسگه آلینیشی یاکه دېپورت قیلینیشیدن قۉرقمسدن مراجعت قیلیش، هر بیر حالت بۉییچه علیحده بهالنیش و ضرور بۉلسه، وقتینچهلیک حمایه همده خوفسیز یشش مقامیگه اېگه بۉلیش امکانینی بېریشی کېرهکلیگینی ایتگن.
بیرلشگن ملتلر تشکیلاتی متخصصلری اۉز بیاناتیده پاکستان طبیات و ستماتولوژی کېنگشینینگ افغانستانلیک طلبهلرنی دېپورت قیلیش حقیدهگی قراریگه هم توختهلگن.
اولرنینگ ایتیشیچه، بو چاره، اینیقسه، افغانستانلیک قیز محصللر اوچون شفاکار و ستماتولوژی بۉلیش امیدینینگ یۉقالیشینی انگلهتهدی، چونکه طالبلر عیاللر اوچون عالي تحصیلات و طبي تعلیم آلیشنی تعقیقلهگن.
بیرلشگن ملتلر تشکیلاتی متخصصلری بیاناتیگه کۉره، اوشبو بویروقلردن کمیده ۱۰۰ نفر افغانستانلیک محصل، جملهدن، ۲۰ نفردن ۴۰ نفرگچه عیال محصللر تأثیرلنهدی.
بیرلشگن ملتلر تشکیلاتی متخصصلرینینگ قۉشیمچه قیلگن: «بیز پاکستاننینگ اوزاق ییللر دوامیده میلیونلب افغانلرنی قبول قیلگنینی و اونینگ اوزاق ییللیک انسانپرورلیک عنعنهلرینی اعتراف اېتهمیز. شو بیلن بیرگه، پاکستان حکومتیدن افغانستانلیکلرنی، اینیقسه، عیاللر و همراهسیز بالهلرنی دېپورت قیلیشنی توختهتیشینی همده قَیترمسلیک تمایلیگه رعایه قیلیش مجبوريتینی بجریشینی سۉرهیمیز. بو تمایلگه کۉره، هېچ بیر شخص تعقیب، قییناقلر، شفقتسیز، غیرِ انساني یاکه قدر-قیمتنی کمسیتووچی معامله یاکه جزاگه، حیات حقوقیدن اۉزباشیمچهلیک بیلن محروم اېتیشگه، مجبوري غایب بۉلیشگه، اۉزباشیمچهلیک بیلن حبسگه آلینیشی یاکه باشقه جدّي و اۉرنینی قاپلب بۉلمهیدیگن ضرر خوفیگه دوچ کېلهدیگن جایگه قَیتریلمسلیگی کېرهک.»
پاکستان ایچکی ایشلر وزیرلیگی جاري ییل نینگ ۲۸-جونیده کۉرستمه چیقریب، ولایت رسميلریگه ۱۰-جولایدن کېین افغانستاندن کېلگن، تېگیشلی حجتلری و عملدهگی رخصتنامهلری بۉلمهگن مهاجرلرنی حبسگه آلیش و دېپورت قیلیشنی بویورگن.
بیرلشگن ملتلر تشکیلاتی متخصصلری اوشبو کۉرسهتمهنینگ عملگه آشیریلیشیدن خواطر بیلدیرگن و آلگن معلوماتلریگه کۉره، ۱۰جولایدن ۲۷اگوستگچه ۱۲۷ مینگ ۳۴۴ نفر افغانستان وطنداشی پاکستاندن دېپورت قیلینگنینی ایتگن.
اولرنینگ معلوم قیلیشیچه، اوشبو شخصلرنینگ کمیده ۱۴مینگ ۱۸۶نفری مجبورن دېپورت قیلینگن، ۳۸مینگ ۳۸۸نفری اېسه عیاللر و بالهلردن عبارت بۉلگن.
بیرلشگن ملتلر تشکیلاتی متخصصلری اوشبو کۉرستمه عملگه آشیریلگنیدن سۉنگ پاکستانده یشهیاتگن افغانلردن اۉنلب یاردم سۉراولری آلگنینی ایتگن.
اولرنینگ قۉشیمچه قیلیشیچه: «بو شخصلر آرهسیده عیاللر و قیزلر، انسان حقوقلری حمایهچیلری، ژورنالیستلر و ییتکرمه خادملری، سابق محکمهلر، دادستانلر وکیل مدافعهلر، سابق خوفسیزلیک کوچلری خادملری و حکومتنینگ سابق عملدارلری، اَیریم اېتنیک و دیني یاکه اعتقادي گروهلر وکیللری، افراد لزبین، همجنسگرا، دوجنسگرا، تراجنسیتی (LGBT)و تورلی جندر اۉزلیگیگه اېگه شخصلر، شونینگدېک افغانستاننینگ دیفکتوی حاکمیتی – طالبلرگه قرشی بۉلگن یاکه اولرگه قرشی دېب حسابلنهدیگن شخصلر بار.»
اولر، شونینگدېک، افغانستانلیک همراهسیز بالهلرنینگ افغانستانگه دېپورت قیلینهیاتگنی حقیدهگی خبرلر یوزهسیدن جدّي خواطر بیلدیرگن. متخصصلر افغانستانده بالهلرنی قبول قیلیش، اولرگه یاردم کۉرسهتیش و حمایه قیلیش اوچون اولرنینگ احتیاجلریگه ماس تېگیشلی میکانیزملر موجود اېمسلیگینی تأکیدلهگن.
بیرلشگن ملتلر تشکیلاتی متخصصلری پاکستان افغانستانلیک مهاجرلرنی دېپورت قیلهیاتگن یگانه دولت اېمسلیگینی قید اېتیب، برچه دولتلرنی قَیترمسلیک تمایلیگه عاید مجبوريتلریگه رعایه قیلیشگه چقیرگن. اولرنینگ ایتیشیچه، بو تمایل خلقارا عادت حقوقی نینگ بیر قِسمی بۉلیب، برچه دولتلر اوچون مجبوري حسابلنهدی.
اولر، شونینگدېک، باشقه دولتلردن، اینیقسه بای دولتلردن افغانستان مهاجرلری آلدیدهگی مسوولیتنی کۉپراق اۉز ذمّهسیگه آلیشنی سۉرهگن. جملهدن، منطقهدهگی مېزبان دولتلرگه سیاسي و مالی یاردم کۉرسهتیش، پاکستاندهگی افغانلرنی قَیته جایلشتیریش بۉییچه اۉز مجبوريتلرینی بجریش و جدّي تعقیب خوفیگه دوچ کېلهیاتگن افغانلر اوچون خوفسیز یۉللرنی تقدیم اېتیشنی دوام اېتتیریشگه چقیرگن.
پاکستان طالبلر بیلن ضدیتلر کوچهیگنیدن سۉنگ افغانستانلیک مهاجرلرنی دېپورت قیلیشنی کوچهیتیردی. مملکت کۉپلب افغانستانلیک مهجرلرنینگ یشش حجتلرینی اوزهیتیرمهدی و شو طریقه اولر «ناقانوني یشش» مقامیگه توشیب قالدی.
پاکستان حکومتی، شونینگدېک، مملکت پولیسیگه حجتلری بۉلمهگن افغانستانلیک مهجرلرنی انیقلش، حبسگه آلیش و دېپورت قیلیشنی بویوردی.
بیرلشگن ملتلر تشکیلاتی متخصصلری و انسان حقوقلری تشکیلاتلری بوندن آلدین هم پاکستان حکومتیدن افغانستانلیک مهجرلرنی مجبورن دېپورت قیلیشنی توختهتیش و مجبوري قَیترمسلیک تمایلیگه رعایه قیلیشنی سۉرهگن اېدی.
بیراق افغانستان مهاجرلرینی پاکستاندن دېپورت قیلیش دوام اېتماقده. هر کونی یوزلب، بعضاً اېسه مینگلب مهاجرلر پاکستاندن دېپورت قیلینیب، افغانستانگه قَیتریلماقده.
