پاکستان یېتکرمهلرینینگ خبر بېریشیچه، خیبر پختونخوا ایالتینینگ کوهات تومنیده پولیس مجموعهسی و اونینگ ایچیدهگی مسجدگه اویوشتیریلگن هجوم عاقبتیده هلاک بۉلگنلر سانی ۲۱ کیشی یرهلنگنلر اېسه ۱۰۳ نفرگه یېتگن.
جیونیوز خبریگه کۉره، کوهات شفاخانهسی رهبری طاهرشاه بو رقملرنی تصدیقلب، هلاک بۉلگنلر آرهسیده ۱۵ نفر پولیس خادیمی هم بارلیگینی ایتگن.
خیبرپختونخوا پولیسی باش تېکشیروو ذولفقار حمیدنینگ ایتیشیچه، دستلب پارتلاوچی مادّهلر آرتیلگن موتر «پولیس لاینز»مجموعهسی نینگ اېسکی دروازهسیگه اوریلیب، پارتلهگن. شوندن سۉنگ قوراللی تۉقنهشوو باشلنگن.
اونینگ قۉشیمچه قیلیشیچه، تۉقنهشوو دوامیده «مخصوص پولیس بۉلیمی» بناسیده ینه بیر خودکوشلیک پارتلشی صادر بۉلگن.
پاکستان پولیسی مرکزی ادارهسی هم یېتّی نفر قوراللی هجومچی خودکوشلیک هجومیدن سۉنگ «پولیس لاینز» مجموعهسیگه کیرگنینی معلوم قیلگن.
اوشبو اداره پولیس کوچلری و تروریزمگه قرشی کورهش بۉلیمی خادملری هجومچیلر بیلن تۉقنهشگنی همده اولردن آلتی نفری، جملهدن، بیر خودکوش ترورچی و بیر مېرگن اۉلدیریلگنینی بیلدیرگن.
جیونیوز خبریگه کۉره، قوتقروو خدمتی خادملری پارتلش مجموعهدهگی مسجدنینگ تشقی دېواریگه جدّي ضرر یېتکزگنی و ینه بیر دېوارنینگ بیر قِسمی قولهب توشگنینی معلوم قیلگن.
حاضرگچه هېچ بیر گروه اوشبو پارتلش اوچون جوابگرلیکنی اۉز ذمّهسیگه آلمهگن.
پاکستان باش وزیری شهباز شریف، جمهور رییس آصف علی زرداری همده پاکستانده فعالیت یوریتهیاتگن بیر قطار خارجي دیپلوماتلر پارتلشنی قارهلب، قربانلرنینگ عایله اعضالریگه همدردلیک بیلدیرگن.
پاکستانده طالبان افغانستانده حاکمیتنی قَیته اېگهلهگنیدن بېری خوفسیزلیک معمالری و ترورچیلیک هجوملری کۉپهیگن.
پاکستان رسميلری اوشبو هجوملر افغانستان حدودیدن فایدهلنیلگن حالده عملگه آشیریلهیاتگنینی تأکیدلهماقده. بیراق افغانستاندهگی طالبان بو دعوانی رد اېتیب، هېچ بیر گروهگه مملکت حدودیدن باشقه دولتلرگه قرشی فایدهلنیشگه رخصت بېرمسلیگینی اَیتماقده.
