طالبلر تشقی ایشلر وزیرلیگی پاکستاننینگ خیبر-پختونخوا ایالتی کوهات اولسواللیگیدهگی پولیس مجموعهسی حدودیدهگی مسجدگه اویوشتیریلگن هجومنی قارهلهدی.
طالبلر تشقی ایشلر وزیرلیگی مطبوعات سوزلاوچیسی عبدالقهار بلخي بوگون (شنبه، ۲۸-سنبله) بیانات نشر قیلیب، قربانلرنینگ یقینلریگه همدردلیک بیلدیرگن. او مقّدس مسکنلرگه هجوم قیلیشنی آقلب بۉلمهیدیگن حرکت اېکنینی ایتگن.
اونینگ تأکیدلشیچه، طالبلر «خیبر-پختونخوا ایالتینینگ کوهات شهریدهگی مسجدگه اویوشتیریلگن، عاقبتیده بیر قطار آدملر هلاک بۉلگن و یرهلنگن هجومنی قطعیاً قارهلهیدی همده مقّدس مسکنلرگه هجوم قیلیشنی آقلب بۉلمهیدیگن و قارهلشگه لایق حرکت دېب حسابلهیدی».
تیناوون خیبر-پختونخوا ایالتینینگ کوهات اولسواللیگدهگی پولیس مجموعهسی و اونینگ ایچیدهگی مسجدگه اویوشتیریلگن هجوم عاقبتیده کمیده ۲۱ کیشی هلاک بۉلیب،۱۰۳ کیشی یرهلنگن.
کوهات شفاخانهسی باشلیغی طاهر شاه اوشبو رقملرنی تصدیقلب، هلاک بۉلگنلر آرهسیده ۱۵ نفر پولیس خادیمی بارلیگینی بیلدیرگن.
خیبر-پختونخوا پولیسی باش تیکشیروچیسی ذولفقار حمیدنینگ ایتیشیچه، دستلب پارتلاوچی مادّهلر آرتیلگن موتر مجموعهنینگ «پولیس لاینز» دېب اتلهدیگن اېسکی دروازهسیگه باریب اوریلگن و پارتلهگن. شوندن سۉنگ قوراللی تۉقنهشوو یوز بېرگن.
اونینگ قۉشیمچه قیلیشیچه، تۉقنهشوو وقتیده «مخصوص پولیس بۉلیمی» بناسیده ینه بیر خودکوشلیک پارتلشی صادر بۉلگن.
پاکستان پولیسی مرکزي باشقرمهسی معلوماتیگه کۉره، هجومده یېتّی نفر قوراللی هجومچی اشتراک اېتگن. باشقرمه نینگ بیلدیریشیچه، آلتی نفر هجومچی، جملهدن، بیر خودکوش-ترورچی و بیر پولیس بیلن تۉقنهشوو چاغیده اۉلدیریلگن.
پاکستاننینگ «دان» گزېتهسی خبریگه کۉره، گُل بهادیرگه علاقهدار پاکستان طالبانی نینگ (تیتیپی) یوقاری مرتبهلی اعضالریدن تشکیل تاپگن «اتحاد المجاهیدین» گروهی هجوم اوچون جوابگرلیکنی اۉز ذمّهسیگه آلگن.
