سوريه رسميلری مملکت شرقیدهگی دیرالزور ولایتیدهگی حربي پایگاهده پارتلش صادر بۉلیشی عاقبتیده۱۱ کیشی هلاک بۉلگنینی معلوم قیلدی.
سوريه مدافعه وزیرلیگی جمعه کونی، ۲۷سنبله، دیرالزوردهگی اوردو پایگاهلریدن بیریده پارتلش صادر بۉلگنینی معلوم قیلیب، حادثه سببلرینی انیقلش بۉییچه تېرگاو باشلنگنینی بیلدیرگن اېدی.
اۉشه پیتده سوريه دولت عامهوي اخبارات واسطهلری پارتلش جاییگه اۉت اۉچیرووچیلر و قوتقرووچیلر یوباریلگنینی خبر قیلگن، بیراق قربانلر سانینی درحال معلوم قیلمهگن اېدی. پارتلشگه نیمه سبب بۉلگنی حاضرچه انیقلنمهگن.
اوّل هم سوريهده قورال-یراغ انبارلریده شونگه اۉخشش بیر نېچه پارتلش صادر بۉلگن. مملکت اۉن ییلدن آرتیق دوام اېتگن فقرالر اوروشیدن سۉنگ، بشر اسد ۲۰۲۴-ییل آخریده حاکمیتدن اغدریلگنیدن کېین بو دورنی آرتده قالدیریشگه حرکت قیلماقده.
شو آی باشیده هم سوريهنینگ شِمالی-غربیدهگی قورال-یراغ انباریده یوز بېرگن پارتلش عاقبتیده ۱۴ کیشی هلاک بۉلگن اېدی.
بوندن اوّل اېسه مملکت نینگ شِمالی-غربیده اۉق-داریلر آرتیلگن موترنینگ پارتلشی عاقبتیده کمیده بېش کیشی هلاک بۉلگن.
