فرانس پرس خبرگزارلیگی مخبرینینگ خبر بېریشیچه، سعوديه عربستانی پایتختی ریاضدهگی خلق ارا قونالغه یقینیده آرامکو شرکتیگه تېگیشلی یاقیلغی سقلش تانکیده شنبه کونی یانغین صادر بۉلگن.
بو واقعه شهر اهالیسی پارتلش آوازینی اېشیتگنی حقیده خبر بېرگنیدن سۉنگ یوز بېرگن.
نشر قیلینگن تصویرلرده اۉت اۉچیرووچیلر سعوديه عربستانینینگ آرامکو نفت شرکتی لوگوسی توشیریلگن یاقیلغی تانکیدهگی النگهنی اۉچیریشگه اورینهیاتگنی کۉرینهدی.
سعوديه رسميلری حاضرچه اوشبو حادثه یوزهسیدن ایضاح بېرمهگن.
بوگون، شنبه، ۲۸ سنبله سعوديه عربستانی پایتختی ریاضدهگی خلق ارا قونالغه یقینیده آسمانگه قاره توتون کۉتریلیب، یانغین النگهسی کۉرینگن.
شو بیلن بیرگه، پروازلرنی کوزهتووچی وېب-سایت اوشبو قونالغهدهگی اَیریم پروازلر بېکار قیلینگنی و کېچیکتیریلگنینی خبر قیلگن.
بو واقعه سعوديه عربستانی رسميلری هوا هجومی خوفی حقیده آگاهلنتیریش بېرگنیدن بیر نېچه ساعت اۉتیب صادر بۉلگن.
پروازلرنی کوزهتووچی «فلیگهترهدر24» سایتی ریاضدهگی قیرال خالد خلق ارا قونالغهسیده «جدّي اوزیلیشلر» یوز بېرگنینی معلوم قیلیب، قونالغهنی اۉزینینگ اوزیلیشلر ایندېکسیدهگی اېنگ یوقاری درجهگه قۉیگن.
اوشبو اوزیلیشلر سعوديه رسميلری تامانیدن تونده بېریلگن هوا هجومی حقیدهگی آگاهلنتیریشدن کېین یوزهگه کېلگن. بو جاري آیده قۉشنی یمن حدودیدهگی تۉقنهشوولر کوچهیگنیدن بېری بوندهی توردهگی ایلک آگاهلنتیریش بۉلگن.
اېرتهلبکی دستلبکی آگاهلنتیریشدن بیر نېچه ساعت اۉتیب، ریاض نینگ اَیریم اهالیسی «فرانس پرس» خبرگزارلیگیگه پایتختنینگ تورلی حدودلریده نامعلوم منبعدن کېلهیاتگن، بیر نېچه پارتلشگه اۉخشش تاووشلرنی اېشیتگنینی ایتگن.
اهالیدن بیری: «قونالغه تامانده قاره توتون و آلاونی کۉردیک»، دېدی.
یمندهگی حوثيلر جاري آیده تېزکار هجوم باشلهگن و دنیانینگ اېنگ قشّاق مملکتلریدن بیری نینگ کتّه حدودلرینی اېگهللب آلگن.
بو حالت سعوديه عربستانی تامانیدن قۉللب-قوّتلنهیاتگن یمننینگ خلقارا مقیاسده تن آلینگن حکومتینی اوشبو آلدینگه سیلجیشگه جواب قَیتریشده قیین وضعیتگه سالیب قۉیگن.
منطقهدهگی کوچلی دولتلردن بیری بۉلگن سعوديه عربستانی حوثيلر نظارتیدهگی حدودلرگه اۉنلب هوا هجوملرینی عملگه آشیرگن، بیراق اولرنینگ آلدینگه سیلجیشینی توختهته آلمهگن.
ریاض شونینگدېک، اتفاقچیسی بۉلگن امریکادن یاردم سۉرهگن، بیراق بو یاردم حاضرچه عملگه آشمهگن.
بو یمن اوزاق دوام اېتگن ایچکی اوروشی قَیته باشلنگنیدن بېری اوشبو ماجرا سعوديه عربستانی پایتختیگه تهدید سالهیاتگن ایلک حالت بۉلیب، قریب یېتّی آیدن بېری دوام اېتهیاتگن امریکا و ایران اوروشی عاقبتیده باسیم آستیده قالگن جهان اقتصادیاتیگه ینهده کتّه باسیم اۉتکزماقده.
