دایکندیدهگی منبعلر تصدیقلشیچه، پاتو اولسواللیگینینگ سابق خوفسیزلیک قوماندانی رضا مجاهدزاده تاجیکستاندهگی کۉمیر کانیده ایشلهیاتگن پیتده هلاک بۉلگن.
رضا مجاهدزاده دایکندی ولایتینینگ میرامور اولسواللیگی برگر حدودیده یشهگن. اونینگ دفن مراسمی بوگون (شنبه، ۲۸ سنبله) توغیلیب اۉسگن قیشلاغیده اۉتکزیلگن.
منبعلرگه کۉره، مجاهدزاده اۉتگن هفتهنینگ چهارشنبه کونی تاجکستاننینگ سغد ولایتیدهگی کۉمیر کانلریده تونل قولهب توشیشی عاقبتیده دستلب جراحتلنگن، کېین اېسه وفات اېتگن.
منبعلر ایتیشیچه، سابق حربي قریب اوچ ییلدن بېری تاجکستاندهگی کۉمیر کانلریده ایشلب کېلهیاتگن اېدی.
منبعلرگه کۉره، رضا مجاهدزاده تورکيهده حربي یۉنهلیشده تحصیل آلگن و تورلی لوازملرده، جملهدن، دایکندی ولایتینینگ پاتو اولسواللیگیده امنیه قوماندانی صفتیده فعالیت یوریتگن.
او ۱۴۰۲-ییل دلو آییده دایکندی–کابل یۉلیده میدان وردک ولایتینینگ جلریز اولسواللیگی طالبان تامانیدن حبسگه آلینگن و بیر نېچه کوندن سۉنگ آزاد قیلینگن اېدی.
منبعلرگه کۉره، سابق حربي طالبان حبسیدن آزاد اېتیلگنیدن سۉنگ تاجکستانگه کېتگن.
منبعلر ایتیشیچه، تاجکستاندهگی کۉمیر کانلریده یوزلب افغان فقرالری ایشلهیدی. مملکتده ایشسیزلیک کېنگ ترقهلگنی سببلی کۉپلب افغان یاشلری ایش تاپیش اوچون قۉشنی دولتلرگه کۉچیب، عادتده آغیر ایشلرگه، جملهدن، کانلرده ایشلشگه مجبور بۉلماقده.
فقط اۉتگن ییل نینگ اۉزیده کمیده ۱۴ نفر افغانستان فقراسی تاجکستاندهگی کۉمیر کانلریده ایشلهیاتگن پیتده هلاک بۉلگن.
